ცხინვალის სეპარატისტული რეჟიმის ლიდერი ედუარდ კოკოითი საქართველოს პრეზიდენტს უნდობლობას უცხადებს.
"ჩვენ თვალყურს ვადევნებთ, რაც საქართველოში ხდება, ასევე მოვისმინე საქართველოს პრეზიდენტის, რაღაც სამშვიდობო ინიციატივაც. მსგავსი განცხადებები ჩვენ არაერთხელ გვაქვს მოსმენილი. ეს ყველაფერი კი იმაზე მიუთითებს, რომ ჩვენ სააკაშვილის რეჟიმისგან მორიგ პროვოკაციას უნდა ველოდოთ", - აღნიშნა კოკოითიმ სააგენტო "იტარ-ტასში" დღეს გამართულ პრესკონფერენციაზე.
მან ასევე აღნიშნა, რომ ქართული მხარე უარს აცხადებს ე.წ. სამხრეთ ოსეთთან და აფხაზეთთან თავდაუსხმელობის შესახებ ხელშეკრულების გაფორმებაზე და აქვე ხაზი გაუსვა იმ ფაქტსაც, რომ არც ცხინვალი და არც სოხუმი არ აპირებს საქართველოზე თავდასხმას.
"ჩვენ საქართველოზე თავდასხმისთვის არ ვართ განწყობილები. ისტორია გვიჩვენებს, რომ სწორედ საქართველო წარმოადგენს ყოველთვის აგრესორს. მიუხედავად იმისა, რომ საქართველომ 2008 წელს დიდი დარტყმა მიიღო, ის მაინც წამოადგენ ყველაზე საშიშ რეგიონს და არა მარტო კავკასიაში. საქართველომ თავის საომარი პოტენციალი მალე აღადგინა", - დასძინა კოკოითიმ.
მისივე თქმით, ყველაფერს აკეთებს, რომ 2008 წლის ტრაგედია აღარ განმეორდეს, თუმცა სეპარატისტთა ლიდერს სააკაშვილის ხელისუფლებასთან მოლაპარაკების გამართვა დაუშვებლად მიაჩნია.
