აფხაზეთის ჯანდაცვის სამინისტროსა და იაპონიის საელჩოს შორის ხელშეკრულება გაფორმდა, რომელიც თბილისში, კალოუბნის #16-ში მდებარე აფხაზეთიდან იძულებით გადაადგილებულ პირთა სამედიცინო დაწესებულების შენობის რეაბილიტაციას ითვალისწინებს.
ხელმოწერის ცერემონიალს, რომელიც საქართველოში იაპონიის საგანგებო და სრულუფლებიანი ელჩის, მასაიოში კამოჰარას რეზიდენციაში გაიმართა, აფხაზეთის მთავრობის თავმჯდომარე, გიორგი ბარამია დაესწრო.
აფხაზეთის მთავრობის თავმჯდომარემ იაპონიის ელჩს მადლობა გადაუხადა თანამშრომლობისთვის.
"აფხაზეთის მთავრობისთვის ჯანდაცვის სფერო მნიშვნელოვანია, რადგან სწორედ ჯანდაცვა არის ჩვენი ერთ-ერთი პრიორიტეტი. რეაბილიტირებული სამედიცინო დაწესებულება დევნილ მოსახლეობას კვალიფიციურ კონსულტაციას გაუწევს და მაღალ დონეზე მოემსახურება. კიდევ ერთხელ მინდა გამოვხატო ჩემი პატივისცემა და მადლიერება იაპონიის ხელისუფლების მიმართ", - განუცხადა ჟურნალისტებს შეხვედრის დასრულების შემდეგ ბარამიამ.
იაპონიის მთავრობა "გრასრუტისა და ადამიანის უსაფრთხოების პროექტებისათვის საგრანტო დახმარების" ფარგლებში, აფხაზეთიდან იძულებით გადაადგილებულ პირთა სამედიცინო დაწესებულების შენობის რეაბილიტაციას ჩაატარებს, რომელიც თბილისში მცხოვრებ 85 ათასამდე დევნილს მოემსახურება. პროექტის ღირებულება 102,620 აშშ დოლარს შეადგენს.
