ისრაელის თავდაცვის ძალების ინფორმაციით, პალესტინელმა მებრძოლებმა ღაზას სექტორიდან ისრაელის ტერიტორიაზე შეაღწიეს და საზღვართან რამდენიმე დასახლებაში შევიდნენ. მათივე ინფორმაციით, მებრძოლები ისარელის ტერიტორიაზე ხმელეთით, ზღვით და საჰაერო გზით პარაპლანების გამოყენებით მოხვდნენ. ვრცელდება ინფორმაცია დაღუპულთა შესახებ. ისრაელის საგანგებო დახმარების სამსახურის ინფორმაციით, მსხვერპლთა რაოდენობამ 22-ს მიაღწია. დაშავებულია 500-ზე მეტი ადამიანი.
ისრაელის ტერიტორიაზე ისრაელის ჯარისკაცებსა და პალესტინელებს შორის შეტაკებები მიმდინარეობს. საფრთხეში არიან ადგილობრივი მცხოვრებლები და ტურისტები. ვრცელდება ცნობები, რომ პალესტინელები შეიჭრნენ ადგილობრივების საცხოვრებელ სახლებში, ხოლო თავად მოსახლეობამ თავი სავარაუდოდ, თავშესაფრებსა და დაჯავშნულ ადგილებს შეაფარა.
ისრაელის პრემიერ-მინისტრმა ბენიამინ ნეთანიაჰუმ ტერორისტული დაჯგუფება „ჰამასის“ თავდასხმის შემდეგ პირველი საჯარო განცხადება გააკეთა. მისი თქმით, ქვეყანა ომშია.
"ისრაელის მოქალაქეებო, ჩვენ ომში ვართ და არა ოპერაციაში, არა ესკალაციაში, ომში და ჩვენ გავიმარჯვებთ. მტერი გადაიხდის ფასს, რომლის შესახებაც აქამდე არ სმენია". - აღნიშნა ნეთანიაჰუმ.
დაჯგუფება „ჰამასის“ სამხედრო ლიდერმა, მოჰამედ დეიფმა, რომელიც ღაზას აკონტროლებს, განაცხადა: „ჩვენი მოთმინება დასრულდა“. მან პალესტინელებს ბრძოლისაკენ მოუწოდა, მისივე განცხადებით, სარაკეტო იერიშები გაგრძელდება.
ისრაელში, ღაზის სექტორიდან სარაკეტო დარტყმები გამთენიისას განხორციელდა.
