სომხეთი და თურქეთი დიპლომატიური ურთიერთობების დამყარებისა და საზღვრების სრულად გახსნის საბოლოო ეტაპთან ძალიან ახლოს არიან. ამის შესახებ სომხეთის პრემიერ-მინისტრმა ნიკოლ ფაშინიანმა დუბლინში, საერთაშორისო და ევროპულ საქმეთა ინსტიტუტში გამართულ შეხვედრაზე განაცხადა.
როგორც სააგენტო „არმენპრესი“ წერს, ფაშინიანმა სომხეთ-თურქეთის ურთიერთობებში ბოლო წლებში მიღწეულ ხელშესახებ ცვლილებებზე ისაუბრა და აღნიშნა, რომ ქვეყნებს შორის სავაჭრო კავშირებიც ვითარდება.
მისი თქმით, თურქეთმა სომხეთიდან ექსპორტისა და სომხეთში იმპორტისთვის საკუთარი გზები გახსნა, თუმცა ტვირთები ჯერ კიდევ არა უშუალოდ სახმელეთო საზღვრის, არამედ საქართველოს ტერიტორიის გავლით გადაადგილდება.
„დარწმუნებული ვარ, უახლოეს მომავალში თურქეთთან ურთიერთობების სრულ ნორმალიზებას მივაღწევთ“, - განაცხადა ფაშინიანმა.
სომხეთის პრემიერმა ასევე გაიხსენა თურქეთის პრეზიდენტ რეჯეფ თაიფ ერდოღანთან ორი დღის წინ გამართული შეხვედრა და მას პოზიტიური უწოდა.
„ჩვენ ორივემ აღვნიშნეთ, რომ პროგრესს მივაღწიეთ და ბოლო ნაბიჯთან ძალიან ახლოს ვართ - დიპლომატიური ურთიერთობების დამყარებასა და საზღვრების სრულად გახსნასთან“, - განაცხადა ფაშინიანმა.
მისივე თქმით, მეზობელ ქვეყნებთან კეთილმეზობლური ურთიერთობების დამყარება სომხეთის საგარეო პოლიტიკის ერთ-ერთი მნიშვნელოვანი მიმართულებაა.
სომხეთსა და თურქეთს დიპლომატიური ურთიერთობები არ აქვთ, ხოლო ორ ქვეყანას შორის სახმელეთო საზღვარი 1993 წლიდან ჩაკეტილია.
