„ქართული პარტია" საგანგებო თხოვნით მიმართავს გაერო-ს მუდმივ კოორდინატორს საქართველოში, გაერო-ს განვითარების პროგრამის მუდმივ წარმომადგენელს საქართველოში ჯეიმი მაკგოლდრიკს და გაერო-ს ლტოლვილთა უმაღლეს კომისარიატის საქართველოში წარმომადგენლის მოადგილეს კრისტოფ ბიერვირთს, გამოიყენონ მათ ხელთ არსებული ყველა ბერკეტი, რათა კიდევ ერთხელ არ მოხდეს იძულებით გადადგილებულ პირთა უფლებების ხელყოფა.
„საქართველოს ხელისუფლება გეგმავს, თბილისში, 20-ზე მეტი ობიექტიდან, დევნილების იძულებითი გამოსახლება დაიწყოს. ხელისუფლება, თავდაპირველად, აპირებდა, ეს პროცესი ახალი წლის დადგომამდე განეხორციელებინა, მაგრამ „გულმოწყალება" გამოიჩინა და გამოსახლება 2011 წლის იანვრის შუა რიცხვებამდე გადადო. დევნილებისგან კატეგორიულად ითხოვენ, რომ მათ „ნებაყოფლობით" დატოვონ ამჟამინდელი საცხოვრებელი ადგილი და სხვა რეგიონებში გადასახლდნენ. არსებობს რეალური საფრთხე იმისა, რომ ეს ადამიანები აყარონ მშობლიური კერიდან და კიდევ ერთხელ იქცნენ დევნილებად. ხელისუფლების ეს ნაბიჯი ეწინააღმდეგება არა მარტო საქართველოს კანონმდებლობას და საერთაშორისო სამართლის ნორმებს, არამედ ჰუმანიზმის და კაცთმოყვარეობის პრინციპებსაც", - ნათქვამია „ქართული პარტიის" მიმართვაში.
ამასთან, დოკუმენტში გამოხატულია მადლიერება იმ დახმარებისა და მხარდაჭერისთვის, რომელსაც გაერო-ს ლტოლვილთა უმაღლესი კომისარიატი და მისი პარტნიორი ორგანიზაციები უწევენ აფხაზეთისა და სამხრეთ ოსეთის კონფლიქტების შედეგად საკუთარ სამშობლოში დევნილად ქცეულ უამრავ იძულებით გადადგილებულ პირს.
„ეს ადამიანები მუდმივად გრძნობენ თქვენს თანადგომას საკუთარი უფლებების დაცვის საქმეში, რომელსაც სისტემატურად ხელყოფს საქართველოს დღევანდელი ხელისუფლება", - აღნიშნულია მიმართვაში.