საქართველოსა და არაბთა გაერთიანებული საემიროებს შორის შემოსავლებსა და კაპიტალზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის ხელშეკრულება გაფორმდა.
საქართველოს მთავრობის სახელით შეთანხმებას ხელი მოაწერა ფინანსთა მინისტრის მოადგილემ რუსუდან კემულარიამ, ხოლო არაბთა გაერთიანებულ საემიროების მთავრობას წარმოადგენდა გაერთიანებულ საემიროების ფინანსთა სამინისტროს გენერალური დირექტორი იოუნის ჰაჯი ალ ხოორი.
სტატისტიკური მონაცემების შესაბამისად, არაბთა გაერთიანებული საემიროები საქართველოს ერთ-ერთი სტრატეგიული პარტნიორია, რასაც ადასტურებს შემდეგი ეკონომიკური მაჩვენებლები: 2007-2009 წლებში სავაჭრო ბრუნვამ ორ ქვეყნებს შორის 76 121 200 ა.შ.შ. დოლარს გადააჭარბა, რაც წარმოადგენს საქართველოს საგარეო ვაჭრობის 20.5%-ს, ხოლო საქართველოში განხორციელებული პირდაპირი ინვესტიციების თანხამ 600 191 200 ა.შ.შ. დოლარი შეადგინა.
"ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ" შეთანხმებასთან დაკავშირებით წარმოდგენილი შეთანხმების ტექსტი ეფუძნება ეკონომიკური თანამშრომლობისა და განვითარების ორგანიზაციის მოდელს. მოდელის შესაბამისად, შეთანხმების პროექტი ითვალისწინებს შემოსავლების დაბეგვრას შემოსავლის წყაროს ქვეყანაში გარკვეული შეზღუდვებით, შეზღუდვების გარეშე, რეზიდენტობის და საწარმოს ფაქტობრივი მართვის ადგილის მიხედვით.
აღსანიშნავია, რომ დივიდენდების, პროცენტის და როიალტის დაბეგვრა ხორციელდება რეზიდენტობის მიხედვით. საქართველოს ეკონომიკური კურსიდან გამომდინარე, წყაროსთან დაბეგვრა არ არის გათვალისწინებული.
ფინანსთა სამინისტროს ინფორმაციით, ქვეყანაში ინვესტიციების მოზიდვისა და ეკონომიკური კავშირების გაფართოების ერთ-ერთი მნიშვნელოვანი პირობაა შემოსავლებსა და კაპიტალზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ შეთანხმებების დადება იმ ქვეყნებთან, რომლებთანაც საქართველოს გააჩნია ეკონომიკური ინტერესები.