პარლამენტის პლენარულ სხდომაზე სასაკლაოებთან და სოფლის მეურნეობის პროდუქტით მოვაჭრეებთან დაკავშირებული კანონპროექტის განხილვა მთავრობის შეთანხმებების დარღვევის გამო შეწყდა.
სოფლის მეურნეობის მინისტრის მოადგილე ალეკო ცინცაძემ კანონპროექტთან დაკავშირებით მიღწეული შეთანხმების ასახვის პირობა დადო, თუმცა აღმოჩნდა, რომ სადავო საკითხები უცვლელად იყო დატოვებული.
პარლამენტის ვიცე-სპიკერი მიხეილ მაჭავარიანი დანტერესდა, "რატომ ატყუებენ პარლამენტს და რატომ ტოვებენ ისეთ ფორმულირებას, რომელიც შეიძლება კორუფციის წყარო გახდეს".
მაჭავრიანის მოსაზრებას იურიდიული კომიტეტის თავმჯდომარე პავლე კუბლაშვილიც დაეთანხმა და იმის გამო, რომ პროექტი ბაზრებში კორუფციული სქემის ამოქმედების შესაძლებლობას იძლევა, მისი პლენარული სხდომის განსახილველი საკითხებიდან მოხსნა მოითხოვა.
კანონპროექტის შინაარსობრივი მხარე უმრავლესობის ლიდერმა პეტრე ცისკარიშვილმაც დაიწუნა და მასში გაწერილი ჯარიმების ოდენობის შემცირებასთან დაკავშირებით კონსულტაციების გაგრძელება მოითხოვა.
უმრავლესობის წევრების მხრიდან გამოთქმული შენიშვნების შემდეგ პარლამენტის თავმჯდომარემ, დავით ბაქრაძემ, საკითხი დღის წესრიგიდან მოხსნა და აღნიშნა, რომ პარლამენტთან მიღწეული შეთანხმებების ასახვის გარეშე, საკანონმდებლო ორგანო მის განხილვაზე საერთოდ უარს იტყვის.
კანონპროექტით, სასაკლაოებისა და სოფლის მეურნეობის პროდუქტზე კონტროლი მკაცრდება. მთავრობის ინციატივით, სურსათის მწარმოებელი საწარმოების შემოწმება 2015 წლის ნაცვლად, 2011 წლიდან უდნა დაიწყოს.