კანკუნს აქვს პოტენციალი, ნახშირბადის დაბალი მოხმარების ხანისკენ ჩვენს საერთო სწრაფვაში ახალი ნიშანსვეტი გახდეს. ამის შესახებ საქართველოს პრეზიდენტმა მიხეილ სააკაშვილმა გაეროს კლიმატის ცვლილებების ჩარჩო კონვენციის მხარეთა მე-16 კონფერენციაზე სიტყვით გამოსვლისას განაცხადა.
მისი თქმით, მსოფლიო ახლოს არის REDD (ტყეების განადგურებით და შემცირებით გამოწვეული ნახშირორჟანგის შთანთქმის შემცირება) ჩარჩო შეთანხმების მიღწევასთან განვითარებადი ერების მიერ ტყეების შენარჩუნებისთვის კომპენსაციის მიღების თაობაზე, ისევე, როგორც „მწვანე ფონდთან" დაკავშირებით.
"შედეგად ეს გამოიღებს მილიარდების მიმართვას ღარიბი ერებისკენ კლიმატის ცვლილებებისადმი ადაპტაციის გასაადვილებლად, განვითარებული ქვეყნებისგან ნახშირბადის დაბალი მოხმარების ტექნოლოგიების გადმოსაღებად და ენერგიის უფრო სუფთა წყაროებზე გადასასვლელად. იდეალურ შემთხვევაში, რა თქმა უნდა, კოპენჰაგენის შეთანხმება გასულ დეკემბერს იქნებოდა მიღწეული და აქ მას შემდეგ შევიკრიბებოდით, რაც წარმატებას მივაღწევდით. როგორც იცით, საქართველო არის და რჩება კოპენჰაგენის შეთანხმების ძლიერ მხარდამჭერად. ჩვენ გვჯერა, რომ დებატების დრო იმის თაობაზე, საჭიროა თუ არა მსოფლიოს რეაგირება კლიმატის ცვლლებაზე, გავიდა; ერთადერთი საკითხი, რაც ჩვენს წინაშე დგას, არის ის, თუ როგორ ვიმოქმედოთ. ასევე მტკიცედ გვჯერა, რომ დაბალნახშირბადიანი სამყარო არა მხოლოდ გარემოს გააუმჯობესებს, არამედ ხელს შეუწყობს რეგიონული უთანხმოებების შემცირებას", - განაცხადა საქართველოს პრეზიდენტმა.
პრეზიდენტმა მადლობა გადაუხადა მექსიკის მთავრობას და, განსაკუთრებით, კონფერენციის პრეზიდენტს, ქალბატონ პატრიცია ესპინოზას. მისი თქმით, მათ არაჩვეულებრივი სამუშაო შეასრულეს კლიმატის ცვლილებების შესახებ მოლაპარაკებების განსაახლებლად.
კონვენციის მხარეთა მე-16 შეხვედრა, რომელიც გაეროს ფარგლებში იმართება, 29 ნოემბრიდან მიმდინარეობს. მასში 192 ქვეყანა და მათ შორის 20 ქვეყნის ლიდერი მონაწილეობს. კონფერენცია 12 დეკემბერს დასრულდება.
