ელექტრონული კომუნიკაციის შესახებ კანონში ცვლილებების შეტანის კანონპროექტი დღეს ბიუროს სხდომაზე დაჩქარებული წესით დარეგისტრირდა.
როგორც ბიუროზე იურიდიულ საქმეთა კომიტეტის თავმჯდომარემ პაველ კუბლაშვილმა აღნიშნა, "ელექტრონული კომუნიკაციების შესახებ კანონში შესატან ცვლილებასთან დაკავშირებით კანონპროექტზე ანდრო ალავიძე, გიორგი მელაძე და თავად პავლე კუბლაშვილი მუშაობენ და შესაბამს კომიტეტებში გავლის შემდეგ ახლა ინიციატივას პლენარულ სხდომაზე სავარაუდოდ მომავალ კვირას გაიტანენ.
კანონში ცვლილების შეტანის ინიციატივით იურიდიულ კომიტეტში კომუნიკაციების მარეგულირებელი კომისია შევიდა, რომელიც ფინასური სანქციების მნიშვნელოვნად შემცირებას ითვალისწინებს.
"კომუნიკაციების შესახებ კანონში ცვლილების შეტანასთან დაკავშირებით იურიდიული კომისიის წევრებს ჩვენი წინადადების გავაცანით, რომლებიც კონკურენციის გამძაფრებასა და ანტიმონოპოლიური საქმიანობის გაძლიერებას გულისხმობს. კერძოდ კი, მცირე მეწარმეებს შეუმცირდეთ ფინანსური სანქციები, რადგან არსებული კანონმდებლობით სანქციები საკმაოდ მაღალია და 10 ათას ლარზე ნაკლები არ შეიძლება იყოს. ახალი ინიციატივის თანახმად კი, ის 3 000 ათას ლარამდე მცირდება", - აღნიშნა კომისიის იურიდიული დეპარტამენტის ხელმძღვანელმა კახი ყურაშვილმა.
მისი თქმით, მნიშვნელოვანია საბაზრო სუბიექტების სტატუსის და მათთვის დამატებითი რეგულაციების დადგენა, რომელიც ხელს შეუწყობს ბაზარზე კონკურენციას, ხოლო მესამე ინიციატივა ამოწურვად რესურსებს ეხება, კერძოდ კი ელექტრონულ-საკომუნიკაციო რადიოსიხშირეების უფრო ეფექტურ გამოყენებას.
"ამ კუთხით წინადადება გვაქვს, რომ სიხშირეები, რომელიც გაიცემა, იყოს პრაქტიკულ საქმიანობაში გამოყენებული და არ იყოს თაროზე შემოდებული. დღეს მოქმედი კანონმდებლობის შესაბამისად, რადიოსიხშირეების განაწილება უზრუნველყოფილია, მაგრამ იმავდროულად ამ სიხშირეების პრაქტიკული გამოყენება საჭიროებს საკანონმდებლო დამატებების შეტანას", - აღნიშნა მან.