ლილოში გაფორმების ეკონომიკური ზონა შეიქმნა. ამის შესახებ საქართველოს პრეზიდენტმა მიხეილ სააკაშვილმა განაცხადა. მისი განმარტებით, ეს უპრეცედენტო პროექტი იქნება, რომლის ფარგლებშიც ეკონომიკური ზონა 12 ჰექტარ მიწის ნაკვეთზე განთავსდება.
ქვეყნის პირველი პირის განმარტებით, მიუხედავად იმისა, რომ ბოლო წლებში საქართველომ ყველანაირი რეიტინგით შთამბეჭდავი წინსვლა აჩვენა ბიზნესგარემოს გაუმჯობესებისა და კორუფციასთან ბრძოლის კუთხით, სახელმწიფოსა და მეწარმეებს შორის ურთიერთობებში ჯერ კიდევ ძალიან ბევრი ხარვეზია.
"ჯერაც ბევრ მეწარმეს აქვს განცდა, რომ მათ სათანადოდ არ უსმენენ, უსამართლოდ ექცევა სახელმწიფო და მთავრობა არ აკეთებს საკმარისს იმისთვის, რომ ბიზნესგარემო უკეთესი იყოს. ამის გამო უამრავ საქმიან ადამიანს დაკარგული აქვს სტაბილურობის შეგრძნება და თავს არიდებს ბიზნესის რისკებს. შესაბამისად, არ ახდენს ახალი კაპიტალის ინვესტირებას ბიზნესის გაფართოებაში და არ ქმნის ახალ სამუშაო ადგილებს", - განმარტა პრეზიდენტმა.
გაფორმების ეკონომიკური ზონა (გეზი) ეს არის საქართველოში უპრეცედენტო სიდიდის, 12 ჰექტარზე გაშენებული კეთილმოწყობილი ტერიტორია სრული კომფორტით. სპეციალურად დაგეგმარებული ავტოსადგომი გათვლილია 400 სატვირთო ავტომანქანაზე. შესაძლებელია ერთდროულიად ნებისმიერი რაოდენობის იმპორტიორის მომსახურება კვირაში შვიდი დღე, 24 საათის განმავლობაში. ტვირთის გაფორმებისას, იმპორტიორს აღარ უწევს ძვირადღირებული ბროკერისა და დეკლარატის დაქირავება.
შესაძლებელია იმპორტიორმა დაისვენოს იმ დროს, სანამ მისი ტვირთი გადის გაფორმების პროცედურას. იმპორტიორის სრული ინფორმირება ხდება ერთ ფანჯარასთან, რითაც იგი ზოგავს დროსა და ენერგიას. იმპორტიორს შესაძლებლობა აქვს ისარგებლოს ექსპერტისა და ტექნიკური პერსონალის მომსახურებით. გეზში ტვირთის გაფორმების საფასურის გადახდა შესაძლებელია 5-დღიანი გადავადებით. ტვირთის გაფორმების სრული პროცედურა აქ რამდენიმე წუთში სრულდება.
გაფორმების ეკონომიკური ზონის შექმნა ახალი ეკონომიკური კურსის ნაწილია, რომელიც ითვალისწინებს სამართლიანი, მარტივი და სანდო საგადასახადო სისტემის შეთავაზებას ბიზნესისათვის.