რუსეთი შეშფოთებით ადევნებს თვალყურს აშშ-ის კონგრესში საკანონმდებლო ინიციატივის განხილვას, რომლის თანახმადაც რუსეთი შესაძლოა ტერორიზმის სპონსორ სახელმწიფოდ გამოცხადდეს. ამის შესახებ რუსულ სააგენტო "ტას"-თან ინტერვიუში რუსეთის საგარეო საქმეთა სამინისტროს ჩრდილოეთ ამერიკის დეპარტამენტის უფროსმა ალექსანდრ დარჩიევმა ისაუბრა.
ჟურნალისტმა მას ჰკითხა, განიხილება თუ არა მოსკოვსა და ვაშინგტონს შორის დიპლომატიური ურთიერთობების შემცირებს შესაძლებლობა.
"არ ვისურვებდი ჰიპოთეტურ დისკუსიებში შესვლას იმის შესახებ, თუ რა არის შესაძლებელი და რა არა დღევანდელ ტურბულენტურ ვითარებაში, როდესაც დასავლეთმა, შეერთებული შტატების მეთაურობით, ფეხქვეშ გათელა საერთაშორისო სამართალი და ყველა აბსოლუტური ტაბუ დიპლომატიურ პრაქტიკაში.
თუმცა, ამ კონტექსტში აღსანიშნავია საკანონმდებლო ინიციატივა, რომელიც ახლა კონგრესში განიხილება და რუსეთის ტერორიზმის სპონსორ სახელმწიფოდ გამოცხადებას ისახავს მიზნად", - ამბობს დარჩიევი.
მისი თქმით, რუსეთის ტერორიზმის სპონსორ სახელმწიფოდ გამოცხადებით, ვაშინგტონი გადალახავს იმ წერტილს, რომლის შემდეგაც საქმე შესაძლოა დიპლომატიური ურთიერთობების სრულად გაწყვეტამდეც მივიდეს.
"მოსალოდნელი შედეგების შესახებ ამერიკული მხარე უკვე გავაფრთხილეთ", - ამბობს დარჩიევი.
მანამდე, რუსეთსა და შეერთებულ შტატებს შორის ურთიერთობების სრული გაწყვეტის შესახებ ისაუბრა რუსეთის საგარეო საქმეთა სამინისტროს სპიკერმა მარია ზახაროვამ.
ზახაროვას თქმით, "ასეთი უპასუხისმგებლო ნაბიჯის [ტერორიზმის სპონსორად გამოცხადების] ლოგიკური შედეგი იქნებოდა ვაშინგტონთან დიპლომატიური ურთიერთობების გაწყვეტა".
28 ივლისს სენატმა მიიღო რეზოლუცია, რითაც მოუწოდა სახელმწიფო დეპარტამენტს, აღიაროს რუსეთი ტერორიზმის სპონსორ სახელმწიფოდ ჩეჩნეთში, საქართველოში, სირიასა და უკრაინაში ჩადენილი ქმედებებისთვის, რამაც გამოიწვია "უამრავი უდანაშაულო კაცის, ბავშვისა და ქალის დაღუპვა".
სენატის რეზოლუცია მხოლოდ სარეკომენდაციო ხასიათისაა. საბოლოო გადაწყვეტილებას ტერორიზმის სპონსორ სახელმწიფოდ აღიარების შესახებ სახელმწიფო მდივანი იღებს.
როგორც ცნობილია, სახელმწიფო მდივანი ენტონი ბლინკენი, სენატის რეზოლუციის მიუხედავად, არ არის მზად, რუსეთი ტერორიზმის სპონსორ სახელმწიფოდ გამოაცხადოს, რადგან მისი თქმით, ეს ავნებს აშშ-ის სხვა მოკავშირეებს და სრულად გაანადგურებს ვაშინგტონსა და მოსკოვს შორის მინიმალური დიპლომატიური ურთიერთობის შესაძლებლობას.
ამავდროულად, კონგრესის წარმომადგენელთა პალატაში დარეგისტრირებულია ორპარტიული კანონპროექტი, რომელიც რუსეთის ტერორიზმის სპონსორ სახელმწიფოდ გამოცხადებას ისახავს მიზნად.
ამ კანონპროექტის დამტკიცების შემთხვევაში, კონგრესი გვერდს აუვლის აშშ-ის სახელმწიფო მდივნის, ენტონი ბლინკენის წინაამღმდეგობას და რუსეთს შეიყვანს ტერორიზმის სპონსორ სახელმწიფოთა სიაში.
ტერორიზმის მხარდამჭერი სახელმწიფოების ნუსხას აშშ-ის სახელმწიფო დეპარტამენტი ადგენს. ამ ნუსხაში შეყვანის შემდეგ, სახელმწიფოს უწესდება მთელი რიგი შეზღუდვებისა, რომელიც მოიცავს აშშ-ისგან დახმარების მიღებისა და სამხედრო პროდუქტების ექსპორტისა და იმპორტის აკრძალვას, ორმაგი დანიშნულების საქონლის ექსპორტზე კონტროლს და სხვადასხვა ფინანსურ თუ სხვა სახის შეზღუდვებს.
ამასთან, რუსეთის ტერორიზმის სპონსორ სახელმწიფოდ გამოცხადება საშუალებას მისცემს მოქალაქეებს, უჩივლონ რუსეთის მთავრობას აშშ-ს სასამართლოებში და მიიღონ კომპენსაცია ჩამორთმეული რუსული სახელმწიფო აქტივებიდან.
ამ დროისთვის სიაში ოთხი სახელმწიფოა: კუბა, ჩრდილოეთ კორეა, ირანი და სირია.
