ევროკავშირის საგარეო ქმედებათა სამსახურის მთავარი სპიკერი პიტერ სტანო ეხმიანება "ქართული ოცნების" თავმჯდომარის ირაკლი კობახიძის კრიტიკას, რომელიც მან ელჩ კარლ ჰარცელისადმი გამოთქვა.
პიტერ სტანოს განცხადებით, ევროკავშირი სრულ მხარდაჭერას უცხადებს ელჩ ჰარცელს. მისივე თქმით, საკუთარი განუხორციელებელი ამბიციების გამო სხვების დადანაშაულება მხოლოდ იმას აჩვენებს, რომ საქართველოს მეტი დრო სჭირდება გაიგოს, როგორ მუშაობს ევროკავშირი.
„საქართველო: ევროკავშირის დღის წესრიგით გათვალისიწინებული რეფორმების განხორციელება ადგილობრივი პოლიტიკოსების ამოცანაა, საკუთარი განუხორციელებელი ამბიციების გამო სხვების დადანაშაულება მხოლოდ ადასტურებს მეტი დროის საჭიროებას იმის გასაგებად, თუ როგორ მუშაობს ევროკავშირი და ეს რეფორმები საშინაო დავალებაა. ევროკავშირი სრულ მხარდაჭერას უცხადებს კარლ ჰარცელს, რომელმაც დიდი სამუშაო გასწია ევროკავშირ-საქართველოს დაახლოებისთვის",- წერს პიტერ სტანო "ტვიტერში".
შეგახსენებთ, 20 ივლისს ირაკლი კობახიძემ განაცხადა, რომ კარლ ჰარცელი საქართველოსა და ევროკავშირს შორის ურთიერთობებში მხოლოდ უარყოფით როლს ასრულებდა.
იმავე დღეს, პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ განაცხადა, რომ „კარლ ჰარცელს შეეძლო უკეთესად ემუშავა იმისთვის რომ საქართველოს კანდიდატის სტატუსი მიეღო“.
