შემოსავლების სამსახურში გატარებული მორიგი რეფორმის შედეგად ადმინისტრირება მარტივდება.
როგორც შემოსავლების სამსახურის უფროსმა, ფინანსთა მინისტრის მოადგილემ გიორგი ცხაკაიამ განაცხადა, შემოსავლების სამსახურისათვის ადმინისტრირების გამარტივება პრიორიტეტია, რაც ასე მნიშვნელოვანია, როგორც სახელმწიფოსთვის, ასევე კერძო სექტორისათვის.
"ადმინისტრირება მარტივდება. ამისათვის კი შეიქმნა ძალიან კარგი კომპიუტერული სისტემა, რომელიც ადმინისტრირების პროცედურების გადაწყვეტას თავად აწარმოებს. თავად კომპიუტერული სისტემა აძლევს კონკრეტულ ოფიცერს დავალებას თუ სად წავიდეს, ვინ შეამოწმოს და სად განახორციელოს საკონტროლო შესწყიდვა", _ განაცხადა ცხაკაიამ.
მისივე განმარტებით, აღნიშნული პროგრამა დღეიდან გაეშვება. იგი აქამდე სატესტო რეჟიმში მუშაობდა.
ადმინისტრირების პროცედურების გამარტივების შედეგად საგადასახადო ოფიცერი თავად კი აღარ მიიღებს გადაწყვეტილებას ვინ შეამოწმოს და სად განახორციელოს საკონტროლო შესყიდვა, არამედ ოფიცერს ეს-ემ-ესი-თ მიუვა შეტყობინება თუ სად უნდა წავიდეს და სად განახორციელოს საკონტროლო შეწყიდვა და ეს სისტემა მთლიანად ხდება პროგრამიზებული.
