პრემიერ-მინისტრმა ნიკოლოზ გილაურმა მთავრობის სხდომაზე საქართველოში მსოფლიო ბანკის ეგიდით გამართული ორდღიანი კონფერენციის შედეგები შეაჯამა და განაცხადა, რომ საქართველო რეგიონში რეფორმების ექსპორტიორ ქვეყნად რჩება.
"კონფერენციაში მონაწილეობისთვის ჩამოსული იყვნენ 30 ქვეყნის წარმომადგენლები. მათ მოინახულეს და გაეცნენ ფინანსთა სამინისტროში, იუსტიციის სამინისტროში და შინაგან საქმეთა სამინისტროში გატარებულ რეფორმებს. ამის შემდეგ მე მათთან მქონდა შეხვედრა და იქ ითქვა, რომ ძალიან ბევრი რეფორმის კოპირებას აპირებენ თავიანთ ქვეყნებში. შესაბამისად საქართველო რეფორმების ექსპორტიორად რჩება, რაც ქვეყნის ეკონომიკური და პოლიტიკური განვითარებისთვის მნიშვნელოვანია" - განაცხადა ნიკა გილაურმა.
შეგახსანებთ, რომ მსოფლიო ბანკის საერთაშორისო საფინანსო კორპორაციის და საქართველოს მთავრობის ინიციატივით თბილისში ორდღიანი კონფერენცია ჩატარდა, რომელზეც რეგიონში მიმდინარე ეკონომიკური რეფორმები, მიღწევები და ბიზნესის განვითარება შეჯამდა.
კონფერენციაში 30-ზე მეტი ქვეყნის ვიცე-პრემიერები და ფინანსთა მინისტრები მონაწილეობდნენ. კონფერენციის საქართველოში ჩატარება მნიშვნელოვანი იყო იმითაც, რომ სულ ახლახანს მსოფლიო ბანკმა საქართველო 174 ქვეყანას შორის ნომერ პირველ რეფორმატორად დაასახელა.
მსოფლიო ბანკის ინფორმაციით, საქართველოში მარტივია ბიზნესის კეთება, რაც ასე მნიშვნელოვანია ნებისმიერი ქვეყნის ეკონომიკური განვითარებისთვის.