სანქტ-პეტერბურგში რუსეთის პრეზიდენტ ვლადიმირ პუტინისა და მისი ერთგული მოკავშირის, ბელარუსის პრეზიდენტ ალექსანდრ ლუკაშენკას შეხვედრა გაიმართა.
შეხვედრაზე პუტინი ლუკაშენკას რუსული სარაკეტო სისტემის "ისკანდერ მ"-ის გადაცემას დაჰპირდა.
"როგორც ჩვენ შევთანხმდით - თქვენ წამოწიეთ ეს საკითხი - ჩვენ მივიღეთ გადაწყვეტილება", - თქვა პუტინმა და დასძინა, რომ კომპლექსები ბელარუსში უახლოეს თვეებში ჩავა.
რუსეთის პრეზიდენტმა აღნიშნა, რომ "ისკანდერ-მ"-ს შეუძლია გამოიყენოს როგორც ბალისტიკური, ასევე საკრუიზო რაკეტები, "როგორც ჩვეულებრივი, ისე ბირთვული".
თავის მხრივ, ლუკაშენკამ თქვა, რომ მინსკი, მოსკოვის მსგავსად, მზად უნდა იყოს "ყველაზე სერიოზული იარაღის" გამოყენებისთვისაც კი.
შეგახსენებთ, ალექსანდრ ლუკაშენკა "ისკანდერის" გადაცემის მოთხოვნით ჯერ კიდევ გასული წლის ნოემბერში გამოვიდა. "მე მსურს 500-კილომეტრიანი დიაპაზონის სარაკეტო სისტემები", - აცხადებდა ლუშაკენკა დაჟინებით. მაშინ რუსეთის საექსპერტო წრეებში ვარაუდობდნენ, რომ კრემლი მინსკს "ისკანდერს" არ გადასცემდა.
როგორც გამოცემა "ინტერფაქსს" რუსეთის თავდაცვის სამინიტროს ყოფილმა წარმომადგენელმა, თადარიგის გენერალ-ლეინტენანტმა ევგენი ბუჟინსკიმ განუცხადა, რუსეთი მინსკს "ისკანდერებს" არ გადასცემს.
"თუ ჩვენ ამას გავაკეთებთ, მაშინ რა შეუშლოს ხელს ამერიკელებს განალაგონ თავიანთი რაკეტები სადმე პოლონეთში ან ბალტიისპირეთში?", - ამბობდა ბუჟინსკი.
"ისკანდერ-მ" - ოპერატიულ-ტაქტიკური სარაკეტო კომპლექს "ისკანდერის" უახლესი მოდიფიკაციაა. მისი მოქმედების რადიუსი 500 კილომეტრია. რამდენიმე წლის წინ, კრემლმა ყველა სამხედრო ოლქში, თანამედროვე "ისკანდერ მ"-ის სისტემებით, მოძველებული "ტოჩკა უ"-ს სარაკეტო სისტემები ჩაანაცვლა, რომლის მოქმედების რადიუსი მხოლოდ 120 კილომეტრია.
რუსეთის თავდაცვის სამინისტროს ინფორმაციით, "ისკანდერ-მ"-ის ოპერატიულ-ტაქტიკური სარაკეტო კომპლექსები მოუხელთებელია რაკეტსაწინააღმდეგო თავდაცვის არსებული და პერსპექტიული სისტემებისთვის, შეუძლია გადალახოს 500 კმ 4 წუთში, ამასთან, 9М728 ან Р-500 ქობინების სამიზნე ცდომილება არ აღემატება 1 მეტრს.
რუსეთის არმიამ სწორედ, 2008 წლის აგვისტოს ომის დროს, რეალურ საბრძოლო მოქმედებაში, პირველად გამოსცადა "ისკანდერის" სარაკეტო კომპლექსი. კასეტური ქობინებით აღჭურვილი ბალისტიკური რაკეტებით, სულ მცირე ოთხჯერ, დაიბომბა გორი, ფოთი, ვაზიანის სამხედრო აეროდრომი და ონის რაიონის ტერიტორია.
