ბელარუსის პრეზიდენტმა ალიაქსანდრ ლუკაშენკამ, რომელსაც დასავლეთის ქვეყნები ლეგიტიმურ მმართველად არ მიიჩნევენ, განაცხადა, რომ ბელარუსს სურს რუსეთისგან მიიღოს სარაკეტო კომპლექს "ისკანდერის" რამდენიმე დივიზიონი.
"მე მინდა რამდენიმე დივიზიონი დასავლეთ და სამხრეთ მიმართულებით. დაე, იდგნენ იქ. ეს 500 კილომეტრია (მოქმედების რადიუსი), რადგან ჩვენი "პოლონეზი" – 300 კილომეტრამდეა. მე მინდა ეს 500-კილომეტრიანი სარაკეტო დანადგარები", - უთხრა ლუკაშენკამ რუსულ გამოცემა "ნაციონალნაია ობორონას".
მისი თქმით, შესაძლოა, ბელარუსის ტერიტორიაზე სამხედრო მოქმედებები განვითარდეს.
"ჩვენ ტყიანი და ჭაობიანი ტერიტორია გვაქვს. თუ ჩვენს წინააღმდეგ დაიწყება სახმელეთო ოპერაცია, უნდა შეგვეძლოს ხმელეთზე ბრძოლა", - განაცხადა ლუკაშენკამ.
როგორც გამოცემა "ინტერფაქსს" რუსეთის თავდაცვის სამინიტროს ყოფილმა წარმომადგენელმა, თადარიგის გენერალ-ლეინტენანტმა ევგენი ბუჟინსკიმ განუცხადა, რუსეთი მინსკს "ისკანდერებს" არ გადასცემს.
"თუ ჩვენ ამას გავაკეთებთ, მაშინ რა შეუშლოს ხელს ამერიკელებს განალაგონ თავიანთი რაკეტები სადმე პოლონეთში ან ბალტიისპირეთში?", - განაცხადა ბუჟინსკიმ.
კრემლს ოფიციალური კომენტარი ლუკაშენკას მოთხოვნასთან დაკავშირებით ჯერჯერობით არ გაუკეთებია.
ბოლო რამდენიმე კვირაა, ლიეტუვა, ლატვია და პოლონეთი ბელარუსის საზღვარზე მიგრანტების რაოდენობის ზრდის შესახებ საუბრობენ და მიგრაციული კრიზისის შექმნაში ბელარუსს ადანაშაულებენ. შექმნილი სიტუაციის გამო პოლონეთის პრეზიდენტმა ბელარუსთან საზღვარზე საგანგებო მდგომარეობა გამოაცხადა. საზღვრის დასაცავად, ადგილზე იმყოფებიან სამხედრო დანაყოფებები, პოლიცია და სპეცრაზმის ჯგუფები.
ლუკაშენკამ განახადა, რომ მინსკი აღარ აპირებს შეაჩეროს არალეგალი მიგრანტები, რომლებიც ევროკავშირის ქვეყნებში მოხვედრას ცდილობენ. ლუკაშენკას თქმით, დასავლეთის სანქციების გამო ამისთვის აღარ დარჩა აღარც ფული და აღარც ძალა.
"ისკანდერ-მ" - ოპერატიულ-ტაქტიკური სარაკეტო კომპლექს "ისკანდერის" უახლესი მოდიფიკაცია. მისი მოქმედების რადიუსი 500 კილომეტრია. რამდენიმე წლის წინ, კრემლმა ყველა სამხედრო ოლქში, თანამედროვე "ისკანდერ მ"-ის სისტემებით, მოძველებული "ტოჩკა უ"-ს სარაკეტო სისტემები ჩაანაცვლა, რომლის მოქმედების რადიუსი მხოლოდ 120 კილომეტრია.
რუსეთის თავდაცვის სამინისტროს ინფორმაციით, "ისკანდერ-მ"-ის ოპერატიულ-ტაქტიკური სარაკეტო კომპლექსები მოუხელთებელია რაკეტსაწინააღმდეგო თავდაცვის არსებული და პერსპექტიული სისტემებისთვის, შეუძლია გადალახოს 500 კმ 4 წუთში, ამასთან, 9М728 ან Р-500 ქობინების სამიზნე ცდომილება არ აღემატება 1 მეტრს.
რუსეთის არმიამ სწორედ, 2008 წლის აგვისტოს ომის დროს, რეალურ საბრძოლო მოქმედებაში, პირველად გამოსცადა "ისკანდერის" სარაკეტო კომპლექსი. კასეტური ქობინებით აღჭურვილი ბალისტიკური რაკეტებით, სულ მცირე ოთხჯერ, დაიბომბა გორი, ფოთი, ვაზიანის სამხედრო აეროდრომი და ონის რაიონის ტერიტორია.