რუსეთი საპასუხო ზომებს მიიღებს მას შემდეგ, რაც ლიეტუვამ სანქცირებული ტვირთის ტრანზიტი აკრძალა კალინინგრადის ოლქსა და რუსეთის დანარჩენ ტერიტორიას შორის. ამის შესახებ რუსეთის უშიშროების საბჭოს მდივანმა, ნიკოლაი პატრუშევმა კალინინგრადში განაცხადა.
"რუსეთი აუცილებლად უპასუხებს მსგავს მტრულ ქმედებებს. შესაბამისი ღონისძიებები მუშავდება უწყებათაშორის ფორმატში და უახლოეს მომავალში მიიღება", - განაცხადა მან.
პატრუშევის განცხადებით, რუსული მხარის საპასუხო ნაბიჯები "სერიოზულ უარყოფით გავლენას მოახდენს ლიეტუვის მოსახლეობაზე".
მანამდე, 20 ივნისს რუსეთის საგარეო საქმეთა სამინისტრომ დაიბარა ლიეტუვის საქმეთა დროებითი რწმუნებული ვირჯინია უმბრაზენე და მას მკაცრი პროტესტი გამოუცხადა.
ვილნიუსის გადაწყვეტილებას საგარეო საქმეთა სამინისტრომ პროვოკაციული და უკანონო უწოდა. ამავდროულად, მოსკოვმა ლიეტუვას მოუწოდა, დაუყოვნებლივ მოხსნას შეზღუდვა ტვირთის გატარებაზე.
ამასთან, 21 ივნისს რუსეთის საგარეო საქმეთა სამინისტრომ დაიბარა ევროკავშირის ელჩი რუსეთში მარკუს ედერერი. ევროკავშირის დიპლომატის განცხადებით, კალინინგრადის ბლოკადა არავინ ცდილობს და გრძელდება ისეთი ტვირთის გატარება, რომელზეც არ ვრცელდება ევროკავშირის სანქციები.
შეგახსენებთ, 17 ივნისს ლიეტუვამ, რუსეთის წინააღმდეგ ევროკავშირის სანქციების ფარგლებში, თავის ტერიტორიაზე აკრძალა იმ პროდუქტების ტრანზიტი, რომელზედაც სანქციებია დაწესებული. ამ პროდუქტებს შორისაა ქვანახშირი, ფოლადი, სამშენებლო მასალები და სხვა.
აღნიშნული გადაწყვეტილების თანახმად, შეიზღუდა ტვირთის ტრანზიტი კალინინგრადის ოლქსა და რუსეთის დანარჩენ ტერიტორიას შორის.
კალინინგრადის ოლქი პოლონეთსა და ლიეტუვას შორის მდებარეობს ბალტიის ზღვაზე.