სხვადასხვა ოპოზიციური პარტიის წარმომადგენლები ვაშინგტონსა და ბრიუსელში გამგზავრებას აპირებენ, რათა პარტნიორებთან იმუშაონ სანქციების დაწესების საკითხზე იმ პირთა მიმართ, რომლებიც საქართველოს ევროინტეგრაციის გზაზე აფერხებენ. ამის შესახებ პარტია "დროას" ლიდერმა ელენე ხოშტარიამ ბრიფინგზე განაცხადა.
ელენე ხოშტარიას განცხადებით, ირაკლი ღარიბაშვილის განცხადება ევროკავშირის წევრობის კანდიდატის სტატუსთან დაკავშირებით მოღალატეობრივია და დროა, ოპოზიცია მოქმედებაზე გადავიდეს.
"11 ივნისს, ირაკლი ღარიბაშვილისგან, რეალურად კი ბიძინა ივანიშვილისგან, ჩვენ მოვისმინეთ ძალიან ღია მოღალატეობრივი განცხადება - ჩვენი ქვეყნის ინტერესების ღალატი. ეს არ არის გადამეტებული სიტყვები, ჩვენ ვნახეთ, რომ ნელ-ნელა პროცესი რომელიც მიდიოდა ევროკავშირის პერსპექტივის წინააღმდეგ, მივიდა იმ წერტილამდე, როდესაც ღარიბაშვილი ღიად გვეუბნება, რომ კანდიდატობა არაფერს ნიშნავს და პრაქტიკულად ხელს უკრავს ჩვენი ქვეყნის ყველაზე მნიშვნელოვან რამეს - ევროპულ პერსპექტივას.
ეს მოულოდნელი არ არის და ჩვენ არც წუწუნს ვაპირებთ, ჩვენ ვაპირებთ მოქმედებას. ჯერი დღეს რეალურად ჩვენზეა, ყველა იმ პროდასავლურ მოქალაქეზე, ოპოზიციონერზე, აქტივისტზე, სამოქალაქო სექტორზე რომლისთვისაც ეს არის გადამწყვეტი მომენტი. ამიტომ მე მინდა, გაგაცნოთ რა არის გეგმა და რა უნდა გავაკეთოთ ჩვენ", - თქვა ხოშტარიამ.
ელენე ხოშტარიას განცხადებით, ოპოზიცია დასავლეთში ორი საკითხის გასამყარებლად მიდის.
"ამოცანა ჩვენს პარტნიორებთან მუშაობის არის მათთვის ჩვენი ხალხის ნების უფრო მტკიცედ და ხმამაღლა გაცნობა. „დროას“ და სხვა ოპოზიციური პარტიების წარმომადგენლებიც მიემგზავრებიან დასავლეთში ბრიუსელსა და ვაშინგტონში, სწორედ ამ საკითხების გასამყარებლად - სანქციების და ჩვენი ხალხის ნების საჩვენებლად, რომ ერთი ოლიგარქი არ უნდა უშლიდეს ხელს გავხდეთ ევროპის ნაწილი", - თქვა ხოშტარიამ.
ამავე ბრიფინგზე, ელენე ხოშტარია გამოვიდა ინიციატივით, სანქციები დაუწესდეს სახელმწიფო უწყებებს, რომლებიც პოლიტიკურ დაკვეთას ასრულებენ.