რომ არა ზალიკო უდუმაშვილი, 2017 წელს პარტიის არსებობა შესაძლოა, კითხვის ნიშნის ქვეშ დამდგარიყო - განაცხადა "ნაციონალური მოძრაობის" თავმჯდომარემ, ნიკა მელიამ ზაალ უდუმაშვილის მიერ პარტიის დატოვების გადაწყვეტილებასთან დაკავშირებით.
ნიკა მელიამ ზაალ უდუმაშვილს გაწეული სამსახურისთვის მადლობა გადაუხადა.
"შეიძლება, გარედან არ ჩანდა, რა გამოწვევის წინაშე ვიდექით, მაგრამ მერწმუნეთ, კარგად მახსოვს ის პერიოდი და მოყოლებული 2017 წლიდან დღემდე, იმ ბრძოლისთვის, რომელსაც დაუღალავად ეწეოდა ზალიკო. თუმცა, მიმაჩნია, რომ ის ნაბიჯი, რომელსაც იგი ახლა დგამს, არანაკლებ მძიმე იქნება, რადგან ამ ქვეყანაში თუკი რამე არის ასევე დასაცავი, ეს არის თავისუფალი სიტყვა და ამ პროცესში ზალიკო უდუმაშვილი იტყვის ძალიან მნიშვნელოვან სიტყვას. წარმატებები ზალიკოს და დიდი მადლობა ყოველგვარი მიკიბმოკიბვის გარეშე. ბევრს ხშირად ავიწყდება და როგორც ჩანს, დაავიწყდა – რომ არა ზალიკო უდუმაშვილი, ამ პარტიის არსებობა-არარსებობა 2017 წელს სერიოზული კითხვის ნიშნის ქვეშ შეიძლება, დამდგარიყო, დიდი მადლობა ამისთვის და არა მხოლოდ ამისთვის“, – აღნიშნა ნიკა მელიამ.
