თუ ვინმე იმსახურებს კანდიდატის სტატუსს - ეს საქართველოა, - აცხადებს საპარლამენტო უმრავლესობის წევრი მარიამ ლაშხი პარლამენტის პლენარულ სხდომაზე.
მისი განცხადებით, ისტორიული გადაწყვეტილების მიღებამდე ძალიან ცოტა დრო რჩება, ერთ თვეზე ნაკლები დროა დარჩენილი და "საქართველოს ხელისუფლება ძალ-ღონეს არ იშურებს, რომ ყველა ფრონტზე საქართველომ მიაღწიოს წარმატებას ჩვენს ევროინტეგრაციის გზაზე".
"საქართველო, უკრაინასა და მოლდოვას შორის, ბოლო წლებში განხორციელებული წარმატებული რეფორმის შედეგად მიღებულ რეალურ ინდიკატორებს თუ დავეყრდნობით, თუ ვინმე იმსახურებს კანდიდატის სტატუსს - ეს საქართველოა. ამის ფონზე სამწუხაროა, რომ რადიკალური ძალა არა თუ ხალხის არჩევანის და მათი შესრულების გვერდში დგას, არამედ მიმართულია დესტაბილიზაციისაკენ და ასევე გამოდის სამშვიდობო პოლიტიკის წინააღმდეგ. რაც მათ წარმოდგენაში შეიძლება იყოს ევროკავშირის მიერ კანდიდატობაზე უარის თქმა. თუმცა მათთვის სამწუხარო შეტყობინებაა ის, რომ მათ გეგმას, რომლის ამუშავებასა და ამოქმედების პროცესსაც, რომელზეც მათ შორის ბაკურიანის შეხვედრებზე აქტიურად მუშაობდნენ, პერსპექტივა არ გააჩნია. ვინაიდან ჩვენ და ჩვენი რეალური მოკავშირეები ყველაფერს ვაკეთებთ იმისათვის, რომ ქვეყანამ შეინარჩუნოს პირველ რიგში სტაბილურობა, მშვიდობა და მიიღოს კანდიდატის სტატუსი. გააძლიეროს რეფორმების განხორციელება, რაც არა რომელიმე პარტიის არჩევანია, არამედ ეს არის ხალხის არჩევანი და ამიტომ მის განხორციელებას ალტერნატივა არ აქვს", - განაცხადა მარიამ ლაშხმა.