პაკისტანის პრემიერ-მინისტრმა შაჰბაზ შარიფმა საგარეო საქმეთა მინისტრად დანიშნა მოკლული ყოფილი პრემიერ-მინისტრის, ბენაზირ ბჰუტოს ვაჟი ბილავალ ბჰუტო-ზარდარი.
28 აპრილს, ოქსფორდში განათლებამიღებულმა ბილავალ ბჰუტო-ზარდარმა ფიცი დადო პაკისტანის პრეზიდენტის, არიფ ალვის წინაშე.
33 წლის ბჰუტო-ზარდარი მსოფლიოს ერთ-ერთი ყველაზე ახალგაზრდა საგარეო საქმეთა მინისტრი გახდა. ის პაკისტანის სახალხო პარტიის ლიდერია. ბჰუტო-ზარდარი პარტიის ლიდერი გახდა 19 წლის ასაკში, დედის მკვლელობის შემდეგ, როდესაც ჯერ კიდევ ოქსფორდის სტუდენტი იყო.
ბილავალ ბჰუტო-ზარდარის დედა, ბენაზირი მოკლეს 2007 წელს საარჩევნო კამპანიის დროს, ხოლო მისი ბაბუა ზულფიკარ ალი ბჰუტო - ასევე, წარსულში პაკისტანის საგარეო საქმეთა მინისტრი და პრემიერ მინისტრი - ჩამოახრჩვეს სამხედრო დიქტატურის დროს 1979 წელს.
ბენაზირ ბჰუტოს მკვლელი არ დაუკავებიათ და გაეროს გამოძიებამ დაადგინა, რომ პაკისტანის ხელისუფლებამ ვერ შეძლო მისი დაცვა და მისი სიკვდილის სათანადო გამოძიება.
შეგახსენებთ, 11 აპრილს პაკისტანის პარლამენტმა ქვეყნის ახალ პრემიერ-მინისტრად ოპოზიციური პარტია "პაკისტანის მუსლიმთა ლიგის" ლიდერი შაჰბაზ შარიფ აირჩია.
