ოკუპანტ რუსეთში აცხადებენ, რომ უკრაინისთვის დასავლეთის მიერ გაგზავნილი შეიარაღების კოლონა რუსეთის შეიარაღებული ძალების "კანონიერი სამიზნე" გახდება. ამის შესახებ აგრესორი ქვეყნის საგარეო საქმეთა მინისტრის მოადგილემ, სერგეი რიაბკოვმა განაცხადა.
"რუსეთმა აშშ გააფრთხილა შედეგებზე, რომელიც უკრაინისთვის შეიარაღების გადაცემას მოყვება. დასავლეთის შეიარაღების კოლონა, რომელიც უგუნურად გადაეცემა უკრაინას, რუსეთის შეიარაღებული ძალების კანონიერი სამიზნე გახდება", - თქვა აგრესორმა რიაბკოვმა.
ამასთან, მან აღნიშნა, რომ აშშ-სა და დასავლეთის სანქციების საპასუხოდ პერსონალური სანქციები უახლოეს ხანებში მომზადდება და გამოქვეყნდება.
ამის გარდა, აგრესორის ქვეყნის წარმომადგენელმა განაცხადა, რომ რუსეთმა შესაძლოა, მოლაპარაკება განაახლოს აშშ-თან უსაფრთხოების საკითხებზე თუ ვაშინგტონი ამისთვის მზად იქნება.
"არ ვიტყოდი, რომ რუსეთის წინადადებები უსაფრთხოების გარანტიების შესახებ სრულად ძალაში რჩება, რადგან სიტუაცია შეიცვალა", - დასძინა აგრესორმა რიაბკოვმა.
მანამდე, რუსეთის საგარეო საქმეთა სამინისტროს სპიკერმა მარია ზახაროვამ მოუწოდა ნატოსა და ევროკავშირის ქვეყნებს, შეწყვიტონ უკრაინისთვის იარაღის მიწოდება.
დასავლეთის ქვეყნები, უკრაინას აგრესორთან გასამკლავებლად, თავდაცვითი შეიარაღებითა და სამხედრო აღჭურვილობით ეხმარებიან.
