ძალის გამოუყენებლობის შესახებ დადებულ პირობას საქართველოს პრეზიდენტი ევროკავშირს, გაეროსა და ეუთოს წერილობით გაუგზავნის. ამის შესახებ საქართველოს პრეზიდენტმა მიხეილ სააკაშვილმა ევროკავშირში სიტყვით გამოსვლის დროს განაცხადა.
"სათანადო წერილით მივმართავთ გაერთიანებული ერების ორგანიზაციის გენერალურ მდივანს, ეუთოს გენერალურ მდივანსა და ევროკავშირის ხელმძღვანელობას, სადაც მკაფიოდ იქნება გაცხადებული, რომ არ გვინდა ძალის გამოყენება ჩვენი უკანონოდ გაყოფილი ქვეყნის გასაერთიანებლად, არც საოკუპაციო ძალების წინააღმდეგ, არც მათი მარიონეტების წინაღმდეგ, მაშინ, როდესაც გაეროს წესდება შეიძლება გვაძლევდეს ამის უფლებას", - აღნიშნა სააკაშვილმა.
საქართველოს პრეზიდენტის განცხადებით, მისი პირობა ძალის გამოუყენებლობის შესახებ საერთაშორისო სამართლის დაქვემდებარებაში მყოფი სახელმწიფოს ცალმხრივ დეკლარაციას წარმოადგენს.
"ეს ინიციატივა არ არის ადვილი ქვეყნისთვის, რომელიც ნაწილობრივ ოკუპირებულია და 500 ათას იძულებით გადაადგილებულ პირსა და ლტოლვილს ითვლის. მზად ვარ ჩემს რუს პარტნიორებთან ღრმა და ყოვლისმომცველი დიალოგისთვის. უნდა გავაგრძელოთ ჟენევის მოლაპარაკებებში მონაწილეობა იმ იმედით, რომ ჩვენი დღევანდელი პირობა რუსეთს დაარწმუნებს, შეწყვიტოს ამ მოლაპარაკების ბლოკირება, მაგარამ ასევე გვჭირდება პოლიტიკური დილოგის დაწყება იმისთვის, რომ ეს მოხდეს", - აღნიშნა სააკაშვილმა.
