საქართველოს ეროვნული მუზეუმის გენერალურმა დირექტორმა დავით ლორთქიფანიძემ პრესკონფერენცია გამართა, სადაც ისაუბრა გავრცელებულ ინფორმაციასთან დაკავშირებით, თითქოს 2005 წლიდან მუზეუმის ფონდებიდან ექსპონატები იკარგება.
დავით ლორთქიფანიძის განცხადებით, 2005 წლიდან, ეროვნული მუზეუმის შექმნის დღიდან არც ერთი ნივთი არ დაკარგულა.
"ერთი შემიძლია, რაც კოლექციებს ეხება, გითხრათ, რომ არც ერთი ნივთი, მას შემდეგ, რაც ეროვნული მუზეუმი შეიქმნა, 2005-დან 2022 წლამდე, ე.წ დაკარგული არ არის. შეგვიძლია ვილაპარაკოთ 2005 წლამდე დოკუმენტებზე, რომელიც ჩადის 1852 წლამდე, რომელთანაც უნდა მოხდეს მათი შეჯერება და წესრიგში მოყვანა ძველ დავთრებთან ერთად. თუ რამე უზუსტობებია, ეს ტექნიკური უზუსტობებია. ასე რომ, საუბარი, რომ მუზეუმიდან 2005 წლიდან რამე იკარგება, არასწორია", - თქვა ლორთქიფანიძემ.
მუზეუმის დირექტორმა საზღვარგარეთ საელჩოებში გატანილ ექსპონატებზეც ისაუბრა. მისი თქმით, საელჩოებში ექსპონატების განთავსება 90-იან წლებში დაიწყო, რათა საზღვარგარეთ ახლადშექმნილ დიპლომატიურ მისიებში წარმოდგენილი ყოფილიყო ქართული მხატვრობის ნიმუშები.
"სამწუხაროდ, რაღაც ნაწილი არ იყო დოკუმენტირებული, რაღაც ვთქვათ დაიკარგა, მაგრამ ეს ყველაფერი იყო დაფიქსირებული შემდგომში ჩვენ მიერ და ჩვენ მიერვე მოთხოვნილი. მინდა, ხაზი გავუსვა, რომ 2005 წლიდან, რომელიც მუზეუმიდან გავიდა, ყველა არის სრულად დოკუმენტირებული და სრულად დაბრუნებული. ეს არის ის, რაც მინდა, ყველამ იცოდეს", - დასძინა ლორთქიფანიძემ.
მანამდე, 23 იანვარს კულტურის მინისტრმა თეა წულუკიანმა განაცხადა, რომ ხელოვნების მუზეუმის ფერწერის ფონდიდან დაკარგულია 21 ექსპონატი, მათ შორის, გიგო გაბაშვილის, ახვლედიანის და თოიძის ნახატები.
28 იანვარს, თეა წულუკიანის ბრალდებების საპასუხოდ, ეროვნულმა მუზეუმმა განცხადება გაავრცელა, სადაც ნათქვამია, რომ დაკარგული ექსპონატების შესახებ გავრცელებული ინფორმაცია უსაფუძვლო ბრალდებებია.
მუზეუმის განცხადებით, მათ გაერთიანებაში შემავალი მუზეუმებიდან, მათ შორის ხელოვნების მუზეუმიდან [ეროვნული მუზეუმის შექმნის დღიდან] არც ერთი ექსპონატი არ დაკარგულა.
ამასთან, ეროვნულმა მუზეუმმა გამოაქვეყნა ეროვნული გალერეიდან 1992-2005 წლებში სხვადასხვა საელჩოში გასული ექსპონატებისა და 2012-2021 წლებში ეროვნული გალერეის კოლექციებში დაბრუნებული ნამუშევრების ნუსხებს.
