ჯანმრთლების დაცვისა და სოციალურ საკითხთა კომიტეტის თავმჯდომარის მოადგილე, გიგი წერეთელი, მაგარი სპირტიანი სასმელის 20:00 საათიდან რეკლამირების წინააღმდეგია.
როგორც დღეს ბიუროს სხდომაზე წერეთელმა განაცხადა, იგი აზრს ვერ ხედავს იმაში, თუ რატომ უნდა შეიცვალოს რეკლამის დრო და 22:00 საათიდან 20:00 საათზე გადმოიწიოს.
"თუ ვაპირებთ, კანონში ჩავწეროთ, რომ მაგარი სპირტიანი სასმელის რეკლამის გაშვება 20:00 საათიდან იქნება შესაძლებელი, მაშინ სჯობია, ეს შეზღუდვა საერთოდ მოვხსნათ, რადგან ამას არანირი აზრი არ აქვს. ამ სახით კანონს მხარს არ დავუჭერ", - აღნიშნა წერეთელმა.
იურიდიული კომიტეტის თავმჯდომარის პირველმა მოადგილემ, ლაშა თორდიამ განმარტა, რომ მას შემდეგ, რაც მაგარი სპირტიანი სასმელის რეკლამაზე შეზღუდვა შემოვიდა, ჩატარდა მონიტორინგი, რამდენად მოიმატა არასრულწლოვანებში მისმა გამოყენებამ, რომლებიც ტელევიზიას 22:00 საათის შემდეგაც უყურებენ.
"ამ კუთხით არაფერი შეცვლილა და მიგვაჩნია, რომ არ შეიძლება მაგარი სპირტიანი სასმელის რეკლემების გაშვება დილის საათებში, როდესაც საბავშო გადაცემები გადის", - აღნიშნა თორდიამ.