პარლამენტის თავმჯდომარემ დავით ბაქრაძემ გასული კვირის საერთაშორისო მოვლენები შეაფასა.
როგორც ბაქრაძემ დღევანდელ ბიუროს სხდომაზე აღნიშნა, ნატოს საპარლამენტო ასამბლეაზე მიღებული რეზოლუცია უპრეცედენტოა, რადგან მასში ასახულია ყველა ის საკითხი, რომელიც საქართველოს აწუხებს.
"განსაკუთრებით მნიშვნელოვანია ეს რეზოლუცია, რადგან ეს არის არა მხოლოდ საერთაშორისო დოკუმენტი, ასევე ნატოს 28 წევრი ქვეყნის მოსაზრება, სადაც მათ ცალსახა შეფასება მისცეს რაც ხდება საქართველოში და ყველაფერს თავის სახელი დარქვეს, როგორიც არის ოკუპაცია და ეთნიკური წმენდა", - აღნიშნა ბაქრაძემ.
ამასთან, პარლამენტის თავმჯდომარე ლისაბონის ნატოს სამიტსაც გამოეხმაურა და განაცხადა, რომ სამიტის ფარგლებში მიღებული დოკუმენტი მნიშვნელოვანია, სადაც ნათქვამია, რომ ნატოს კარი ღია საქართველოსთვის.
"ლისაბონის ნატოს სამიტი განსაკუთრებით მნიშვნელოვანია იმ კუთხითაც, რომ მის ფარგლებში მოხდა საქართველოს და აშშ-ს პრეზიდენტების პირისპირ შეხვედრა, რაც კიდევ ერთი დასტურია ორ ქვეყანას შორის განსაკუთრებული ურთიერთოების არსებობის", - დასძინა ბაქრაძემ ბიუროს სხდომაზე.