პრემიერ-მინისტრ ნიკა გილაურის განცხადებით, "გარკვეულ ძალებს" საერთაშორისო პოლიტიკიდან საქართველოს ჩამოშორების მცდელობა არ გამოუვიდა.
ამის შესახებ პრემიერმა გილაურმა მთავრობის დღევანდელ სხდომაზე, გასული კვირის მნიშვნელოვან მოვლენების შეფასებისას, განაცხადა.
"გასული კვირის მოვლენებმა კიდევ ერთხელ დაადასტურეს, რომ გარკვეული ძალების მცდელობა, საქართველო ჩამოეშორებინა საერთაშორისო პოლიტიკას, ნამდვილად შეგვიძლია ვთქვათ, რომ არ გამოვიდა. დღესდღეობით საქართველო არის საერთაშორისო პოლიტიკაში ერთ ერთი მთავარი და საკმაოდ წამატებული თემა", - განაცხადა ნიკა გილაურმა.
შეგახსენებთ, რომ გასული კვირა ქვეყნისთვის რამდენიმე კუთხით იყო მნიშვნელოვანი. უფრო კონკრეტულად, ვარშავაში - ნატოს საპარლამენტო ასამბლეაზე საქართველოს ტერიტორიული მთლიანობის მხარდამჭერი რეზოლუციის მიღება მოხდა, ლისაბონში ამერიკის შეერთებული შტატებისა და საქართველოს პრეზიდენტების შეხვედრა გაიმართა, გარდა ამისა, შედგა მიხეილ სააკაშვილის ოფიციალური ვიზიტი ევროკავშირში, ხვალ კი, საქართველოს პირველი პირი სიტყვით ევროპარლამენტის წინაშე გამოვა.
