ნატოს ახალი სტრატეგიული კონცეფცია აქვს.
გუშინ, ლისაბონის სამიტის პირველივე დღეს მიღებული დოკუმენტით ალიანსის წევრი ქვეყნების ლიდერებმა მომდევნო ათწლეულის სამოქმედო გეგმა განსაზღვრეს.
დოკუმენტში ნათქვამია, რომ ნატოს კარი ღია რჩება ორგანიზაციაში გაწევრიანების მსურველი დემოკრატიული ქვეყნებისთვის.
"ეს არის ნატოს გზამკვლევი მომდევნო ათწლეულის განმავლობაში, რომელიც ჩვენი წევრი ქვეყნების მეთაურებმა მიიღეს. ეს მართლაც ისტორიული მომენტია, რადგან დრო იცვლება და მასთან ერთად იცვლება საფრთხეები და გამოწვევები. ნატოს პრინციპი - საერთო საფრთხეებისგან ერთობლივი თავდაცვა არასდროს შეიცვლება. დოკუმენტი ასახავს იმას, თუ როგორ უნდა დავიცვათ თავი 21-ე საუკუნეში. ახალი კონცეფციის მიხედვით, ნატოს კარი ფართოდ რჩება ღია ევროპული, დემოკრატიული ქვეყნებისთვის, რომლებიც ჩვენს სტანდარტებს აკმაყოფიელებენ", - განაცხადა რასმუსენმა, რომელიც ლისაბონის სამიტის პირველი დღის დასრულების შემდეგ სხდომათა დარბაზიდან სწორედ ამ დოკუმენტით ხელში გამოვიდა.
მისივე განმარტებით, გასულმა ათწლეულებმა დაადასტურა, რომ ნატოს გაფართოებამ ბევრ ქვეყანას უსაფრთხოება და კეთილდღეობა მოუტანა.
აღსანიშნავია, რომ ახალი კონცეფციის მისაღებად ორგანიზაციის წევრი ქვეყნების ლიდერებს საათნახევარი დასჭირდათ.