"ჩვენი საქართველო - თავისუფალის დემოკრატების" ლიდერის ირაკლი ალასანიას შეფასებით, ქართული პოლიცია და ფინანსური სამსახური "გათავხედებულია".
ამის შესახებ ალასანიამ კოლუმბიის უნივერსიტეტში, საქართველოში არსებულ ეკონომიკურ მდგომარეობაზე ლექციის წაკითხვისას განაცხადა.
"ქართული ბიზნესის 60 პროცენტზე მეტი წნეხის ქვეშაა; მათ უკანონოდ აყაჩაღებს და არეკეტებს ხელისუფლება; ბოლო შემთხვევა, როდესაც დააკავეს ამერიკული ბიზნესის წარმომადგენელი "სელფორდიდან", ეს არის ნათელი მაგალითი იმისა, რამდენად გათავხედდა ფინანსური სამსახური და პოლიცია", - განაცხადა ალასანიამ.
მისივე თქმით, ქართულ ეკონომიკაში მიმდინარე პროცესები დიდი ინტერესის საგანია არა მხოლოდ კოლუმბიის უნივერსიტეტში, არამედ თეთრ სახლშიც და სახელმწიფო დეპარტამენტშიც.
შეგახსენებთ, რომ "თავისუფალი დემოკრატების" ლიდერი უკვე რამდენიმე დღეა აშშ-ში ვიზიტით იმყოფება. მის ფარგლებში, ალასანია ხვალ, 20 ნოემბერს, გაეროს გენერალური მდივნის მოადგილებს შეეხვდება.
