საფრანგეთის პრეზიდენტის ადმინისტრაციის, ელისეის სასახლის ინფორმაციით, პრეზიდენტმა ემანუელ მაკრონმა რუსეთის პრეზიდენტ ვლადიმირ პუტინთან სატელეფონო საუბრისას განაცხადა, რომ საფრანგეთი მზადაა, დაიცვას უკრაინის ტერიტორიული მთლიანობა და სუვერენიტეტი.
ელისეის სასახლის განცხადებით, სატელეფონო საუბარი პარიზის ინიციატივით გაიმართა და მან საათსა და 45 წუთს გასტანა.
ემანუელ მაკრონმა პუტინთან საუბრისას ღრმა შეშფოთება გამოხატა უკრაინის საზღვართან რუსეთის სამხედრო ძალების უჩვეულო და მასშტაბური მობილიზების გამო.
საუბრის დასაწყისში განსაკუთრებული ყურადღება ბელარუსის საზღვარზე მიგრაციული კრიზისის დაძლევის აუცილებლობას შეეხო.
საფრანგეთის პრეზიდენტის მრჩევლის განცხადებით, მიუხედავად იმისა, რომ მიგრაციული კრიზისის წარმოშობასთან დაკავშირებით ერთიანი პოზიცია არ არსებობს, მხარეები შეთანხმდნენ, რომ დაძაბული ვითარება ევროკავშირის საზღვართან უნდა დასრულდეს.
ბოლო ხანებია, უკრაინის საზღვართან რუსი სამხედროების მასშტაბური მობილიზების გამო, შეშფოთებას გამოხატავენ, როგორც უკრაინა, ასევე დასავლეთის ქვეყნები. უკრაინის პრეზიდენტ ვოლოდიმირ ზელენსკის განცხადებით, უკრაინის საზღვართან 100 ათასამდე რუსი სამხედრო იმყოფება.
პირველად, ინფორმაცია უკრაინის საზღვართან რუსული ძალების გაზრდის შესახებ გაზეთმა Washington Post-მა გაავრცელა.
გამოცემის მიერ გამოკითხული სამხედრო ექსპერტები ამტკიცებენ, რომ უკრაინის საზღვართან რუსეთმა ჯარების გადაადგილება ჯერ კიდევ სექტემბრის შუა რიცხვებში დაიწყო. რუსეთ-ბელარუსის ერთობლივი სამხედრო წვრთნები "დასავლეთი-2021"-ის დასრულების შემდეგ, სამხედროები დისლოკაციის ადგილზე არ დაბრუნებულან და ისინი რუსეთ-უკრაინის საზღვართან გადაისროლეს.
ცოტა ხნის წინ აშშ-ის სახელმწიფო მდივანმა ენტონი ბლინკენმა განაცხადა, რომ მოსკოვის განზრახვა უკრაინის საზღვართან ჯარების გააადგილებასთან დაკავშირებით, გაურკვეველი რჩება, თუმცა უკრაინის წინააღმდეგ ახალი აგრესიის დაწყება რუსეთისთვის სერიოზული შეცდომა იქნება.
რუსი სამხედროების მასშტაბური მობილიზების გამო, კრემლი ნატო-ს გენერალურმა მდივანმა იენს სტოლტენბერგმაც გააფრთხილა. მისი თქმით, ნატო ნებისმიერი სცენარისთვის მზადაა.
მანამდე გავრცელდა ინფორმაცია, რომ ლონდონი რუსეთის აგრესიის შემთხვევაში უკრაინის სამხედრო დახმარებას განიხილავს.