გაერთიანებული სამეფო მზად არის სპეცრაზმის ოპერატიული ჯგუფი 600 სამხედროს შემადგენლობით უკრაინაში გაგზავნოს რუსეთის შეჭრის შემთხვევაში. ამის შესახებ ბრიტანული გაზეთი The Mirror-ი წერს.
გამოცემის წყაროს ინფორმაციით, ლონდონი ქმნის დანაყოფს, რომელიც შედგება სპეცრაზმის წევრების, მედიკოსების, ინჟინრების, ტელეგრაფისტებისა და 400-მდე მედესანტისგან მე-16 საჰაერო-მოიერიშე ბრიგადიდან, რომელიც ოლდერშოტში არის ბაზირებული.
"ქვედანაყოფს აცნობეს, რომ შესაძლოა, მათი გადასროლა მოკლე დროშო გახდეს საჭირო. 400-დან 600-მდე სამხედრო მზადყოფნაშია. ყველა აღჭურვილობა ჩალაგებულია, ისინი მზად არიან გაფრინდნენ უკრაინაში და ჰაერიდან გადასხდნენ", - განუცხადა The Mirror-ს წყარომ.
დღეს, უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის საზღვართან 100 ათასამდე რუსი სამხედროა თავმოყრილი.
რუსეთი აცხადებს, რომ ჯარის განთავსება მისსავე ტერიტორიაზე, მისი შიდა საქმეა და უარყოფს რაიმე აგრესიულ ზრახვებს, ამასთან აშშ-ს ადანაშაულებს პროვოკაციულ ქმედებებში შავ ზღვაში, სადაც მიმდინარე კვირას ამერიკული სამხედრო ხომალდები შევიდნენ.
პირველად, ინფორმაცია უკრაინის საზღვართან რუსული ძალების გაზრდის შესახებ გაზეთმა Washington Post-მა გაავრცელა.
გამოცემის მიერ გამოკითხული სამხედრო ექსპერტები ამტკიცებენ, რომ უკრაინის საზღვართან რუსეთმა ჯარების გადაადგილება ჯერ კიდევ სექტემბრის შუა რიცხვებში დაიწყო. რუსეთ-ბელარუსის ერთობლივი სამხედრო წვრთნები "დასავლეთი-2021"-ის დასრულების შემდეგ, სამხედროები დისლოკაციის ადგილზე არ დაბრუნებულან და ისინი რუსეთ-უკრაინის საზღვართან გადაისროლეს.
ცოტა ხნის წინ აშშ-ის სახელმწიფო მდივანმა ენტონი ბლინკენმა განაცხადა, რომ მოსკოვის განზრახვა უკრაინის საზღვართან ჯარების გააადგილებასთან დაკავშირებით, გაურკვეველი რჩება, თუმცა უკრაინის წინააღმდეგ ახალი აგრესიის დაწყება რუსეთისთვის სერიოზული შეცდომა იქნება.
"არ გაიმეორონ 2014 წლის შეცდომა, როდესაც რუსეთმა ძალები უკრაინის საზღვართან განათავსა, გადაკვეთა საზღვარი და შეიჭრა სუვერენული უკრაინის ტერიტორიაზე და ამათან ცრუობდა, რომ მისი პროვოცირება მოხდა", - თქვა ბლინკენმა.
უკრაინის საგარეო საქმეთა მინისტრ დმიტრო კულებასთან შეხვედრის დროს, ბლინკენმა ასევე განაცხადა, რომ აშშ-ს ადმინისტრაცია კონგრესთან ერთად იმუშავებს იმაზე, რომ უზრუნველყოს უკრაინისთვის შემდგომი სამხედრო დახმარება, მათ შორის ლეტალური საშუალებებითაც.
ამ განცხადებებმა გაღიზიანება გამოიწვია რუსეთის საგარეო საქმეთა სამინისტროში. მინისტრის მოადგილე სერგეი რიაბკოვმა აშშ-ს ურჩია იმუშაოს თავის შეცდომებზე, ვაშინგტონში რუსეთის ელჩმა ანატოლი ანტონოვმა კი განაცხადა, რომ "კიევის რეჟიმისთვის" იარაღის მიწოდება გააღრმავებს დაძაბულობას უკრაინის სამხრეთ-აღმოსავლეთ ნაწილში.
