მძიმე ეპიდემიოლოგიური ვითარების ფონზე, ოპოზიციური პარტიების ნაწილი ადგილობრივი თვითმმართველობის არჩევნების გადადებაზე ალაპარაკდა.
23 აგვისტოს, სახალხო დამცველმა ნინო ლომჯარიამ პოლიტიკურ პარტიებს არჩევნების გადადების საკითხზე მსჯელობის დაწყებისკენ მოუწოდა.
ლომჯარიას განცხადებით, მაშინ როდესაც ქვეყანაში ასეთი ტრაგიკული და სავალალო მდგომარეობაა, უნდა დაიწყოს დისკუსია არჩევნების გადადებაზე, მით უფრო იმ ფონზე, რომ შარშანდელი არჩევნების შემდეგ ვნახეთ, როგორ დამძიმდა ეპიდსიტუაცია.
სახალხო დამცველის განცხადებას პირველები "სტრატეგია აღმაშენებლის" ლიდერი გიორგი ვაშაძე და "ლელოს" ერთ-ერთი ლიდერი ბადრი ჯაფარიძე გამოეხმაურნენ.
გიორგი ვაშაძე მიიჩნევს, რომ უნდა დაიწყოს დისკუსია არჩევნების გადადებასთან დაკავშირებით.
მისი თქმით, "სტრატეგია აღმაშენებელი" მზადაა, ამ საკითხზე მსჯელობაში მონაწილეობა მიიღოს.
"პირველ რიგში, ხელისუფლების ხელშია არჩევნების გადადების საკითხი, მაგრამ ახლა არ არის იმის დრო, ვინ ვისკენ გაიშვერს ხელს და ვინ იტყვის პირველი, ვინ იტყვის მეორე ან ვინ იტყვის, ვის არ უნდა და ვის უნდა არჩევნები, ფაქტია, იმდენად მძიმე ვითარებაა ქვეყანაში, რომ პოლიტიკაც, არჩევნებიც და ყველაფერი გვაქვს ადამიანებისთვის. თუ ჩვენ ადამიანების სიცოცხლე არ გადავარჩინეთ და კომპლექსური ნაბიჯები არ გადავდგით ამ პირობებში, ვერანაირად ვერ წავალთ წინ. გავიხსენოთ გასული წელი, წინა არჩევნები, სამწუხაროდ, გასულ წელსაც, ნოემბერ-დეკემბერში გაიზარდა ინფიცირებულთა რაოდენობა, მაგრამ ამ ვითარებაში, როცა სამედიცინო სექტორი კოლაფსშია, ექიმები ვეღარ აუდიან პაციენტებს, როცა ყოველდღიურად იზრდება ინფიცირებულთა და გარდაცვლილთა რაოდენობა, 7 000 ადამიანი უკვე ემსხვერპლა კოვიდვირუსს, ჩვენ, „სტრატეგია აღმაშენებელი“ მზად ვართ, ავიღოთ პასუხისმგებლობა და მივიღოთ მონაწილეობა საერთო გადაწყვეტილებაში, საერთო დისკუსიაში არჩევნების ჩატარებასთან ან მცირედით გადავადებასთან დაკავშირებით", - თქვა ვაშაძემ.
"ნაციონალური მოძრაობის" ერთ-ერთი ლიდერისა და ქუთაისის მერობის კანდიდატის, ხატია დეკანოიძის თქმით, პარტია მზად არის ყველა ვარიანტისთვის, რადგან უპირველეს ყოვლისა მათ ინტერესში ადამიანების ჯანმრთელობა და უსაფრთხოებაა.
"ახლა ხელისუფლების რიტორიკა, რომელიც ამბობს, რომ ეს არის ოპოზიციის სისუსტე და ოპოზიციის შემოგდებული თემა, ამაშიც, ისინი არიან ძალიან "ღია და გამჭვირვალე", რომ მათ ადამიანების სიცოცხლე არ აინტერესებთ. ჩვენ ყველა ვარიანტისთვის მზად ვართ, განვიხილავთ ყველა ვარიანტს და უპირველეს ყოვლისა, ჩვენ გვაინტერესებს ადამიანების ჯანმრთელობა და უსაფრთხოება", - განაცხადა ხატია დეკანოიძემ.
კიდევ ერთი ოპოზიციონერი დეპუტატის თამარ კორძაიას განცხადებით, ის რომ პრეზიდენტი იყოს არჩევნებს აუცილებლად გადადებდა.
ოპოზიციისგან განსხვავებით, ამ ეტაპზე, არჩევნების გადადების კატეგორიული წინააღმდეგია მმართველი პარტია "ქართული ოცნება".
"ქართული ოცნების" წევრ გივი მიქანაძის განცხადებით, არჩევნების გადადება არ განიხილება.
"არჩევნების გადადება არ განიხილება. არჩევნები არის უმნიშვნელოვანესი, ჩვენ ვირჩევთ ადგილობრივ თვითმმართველობის წარმომადგენლებს. ყველა მუნიციპალიტეტში ვირჩევთ მერებს. ეს არის ძალიან მნიშვნელოვანი, როგორც ქვეყნის შემდგომი განვითარებისთვის, ასევე მნიშვნელოვანია, იმ განაცხადის სრულფასოვნებისთვის, რომელიც 2024 წელზე გვაქვს აქცენტირებული ევროკავშირთან მიმართებაში", - ამბობს მიქანაძე.
"ქართული ოცნების" ერთ-ერთი ლიდერი გია ვოლსკი სახალხო დამცველის განცხადებას, არჩევნების გადადებასთან დაკავშირებით, „ნაციონალური მოძრაობის“ ინტერესებით ნაკარნახევად მიიჩნევს.
ვოლსკი ამბობს, რომ არჩევნების გადადება შეიძლება "ნაციონალურ მოძრაობას" აწყობდეს, რადგან მათ გამარჯვების პერსპექტივა არ აქვთ.
ამასთან, პარლამენტის ვიცე-სპიკერი დასძენს, რომ საარჩევნო პროცესი ისე წარიმართება, რომ საფრთხეები მინიმუმამდე იყოს შემცირებული.
"ეპიდუსაფრთხოების თვალსაზრისით, საარჩევნო პროცესი, არჩევნების დღე და შემდგომი პერიოდი იმ დონეზე იქნება წარმართული, რომ საფრთხეები მინიმუმამდე იყოს შემცირებული და მართვაც უფრო ადვილი იქნება. სახალხო დამცველსაც და ყველა სხვას მართებს სიღრმისეული კონსულტაციების გავლა დარგის სპეციალისტებთან და არა პოლიტიკურ პარტიებთან და მოღვაწეებთან, რომლებსაც თავისი ინტერესი გააჩნიათ", - აღნიშნავს ვოლსკი.
პარლამენტის ადამიანის უფლებებისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის შეფასებით კი სახალხო დამცველის განცხადება ოპოზიციისთვის მაშველი რგოლია.
"ჩემი პირველი შთაბეჭდილებაა, რომ ეს განცხადება, ამ კამპანიის წამოწყება ერთგვარად მაშველი რგოლის ფუნქციის მატარებელი უნდა იყოს ოპოზიციისთვის, რომელსაც თვითმმართველობის არჩევნებში გამარჯვების არანაირი შანსი არ აქვს და ამას თავად კარგად აცნობიერებენ. ვფიქრობ, სხვა შემთხვევაში ასეთი კამპანიის დაწყებას არგუმენტაცია ნამდვილად აკლია. ვფიქრობ, მათი მხრიდან მეტი დასაბუთებაა საჭირო, თუ რეალურად ფიქრობენ, რომ ეს აუცილებლობაა", - აღნიშნა მიხეილ სარჯველაძემ.
არჩევნების გადადებასთან დაკავშირებით წამოჭრილ დისკუსიას ცენტრალური საარჩევნო კომისიის თავმჯდომარე, გიორგი კალანდარიშვილიც გამოეხმაურა.
როგორც კალანდარიშვილი "რუსთავი 2"-თან აცხადებს, ამ ეტაპზე, ვირუსის გავრცელების მაღალი მაჩვენებლი მიუხედავად, კენჭისყრის გადადების ან შეჩერების აუცილებლობა არ არსებობს