საქართველოს განათლებისა და მეცნიერების მინისტრი მიხეილ ჩხენკელი კვლავ შეახსენებს საზოგადოებას, რომ მიხეილ სააკაშვილის ხელისუფლების დროს ანგრევდნენ სკოლებს, პროფესიულ სასწავლებლებს და უნიკალურ ლაბორატორიებს.
ჩხენკელის განცხადებით, წინა ხელისუფლებისგან განსხვავებით, "ქართული ოცნება სკოლებს და საგანმანათლებლო ცენტრებს აშენებს.
"ინტენსიურად მიმდინარეობს ახალი სკოლების მშენებლობა, სკოლების ინფრასტრუქტურის რეაბილიტაცია და ევროპულ სტანდარტებთან შესაბამისობაში მოყვანა. აქვე, დაბა ნასაკირალში, დასრულდა მშენებლობა ახალი შესანიშნავი თანამედროვე სტანდარტების სკოლის, რომელიც გათვლილია 600 მოსწავლეზე. ახლა მიმდინარეობს სკოლის აღჭურვა და ახალი სასწავლო წლიდან მოსწავლეებს საშუალება ექნებათ, განათლება მიიღონ მართლაც მშვენიერ გარემოში, სადაც ყველა პირობა იქნება შექმნილი ხარისხიანი განათლებისთვის. ეს უაღრესად მნიშვნელოვანი პროექტი არის ნათელი მაგალითი ჩვენი დამოკიდებულებისა. როგორც გახსოვთ, სააკაშვილის ხელისუფლების დროს სკოლებს ანგრევდნენ, ანგრევდნენ პროფესიულ სასწავლებლებს, ანადგურებდნენ უნიკალურ ლაბორატორიებს, სამეცნიერო-კვლევით ცენტრებს. მათგან განსხვავებით ჩვენ სკოლებს და საგანმანათლებლო ცენტრებს ვაშენებთ. სოფელ ნასაკირალის სკოლის ანალოგიური პროექტები მიმდინარეობს მთელი ქვეყნის მასშტაბით, რადგანაც ბავშვებზე და მათ განათლებაზე ზრუნვა არის ჩვენი უმთავრესი პრიორიტეტი. ეს პირდაპირი მნიშვნელობით არის ჩვენი ქვეყნის უკეთეს მომავალზე ზრუნვა", - განაცხადა ჩხენკელმა „ქართული ოცნების" ოზურგეთის მერობის კანდიდატის ავთანდილ თალაკვაძის წარდგენაზე.
შეგახსენებთ, მიხეილ ჩხენკელმა ორი დღის წინაც განაცხადა, რომ სააკაშვილის ხელისუფლების დროს სკოლებს ანგრევდნენ.