საქართველოში შეერთებული შტატების ელჩმა, კელი დეგნანმა კომენტარი გააკეთა უზენაესი სასამართლოს მოსამართლეების დანიშვნაზე სახელმწიფო მდივან ენტონი ბლინკენისა და სახელმწიფო დეპარტამენტის განცხადებებთან დაკავშირებით.
კელი დეგნანის განცხადებით, აშშ-ის მთავრობის განცხადებები არის საქართველოს სტრატეგიული პარტნიორის შეშფოთების გამომხატველი გზავნილები, რაც ძალიან სერიოზულად უნდა იყოს აღქმული.
სანქციები არის ხელთარსებულ მრავალ ინსტრუმენტს შორის ერთ-ერთი. ვფიქრობ, თქვენ იხილეთ აშშ-ის საელჩოს და სახელმწიფო დეპარტამენტის, სახელმწიფო მდივნის მიერ გავრცელებული განცხადებები, რომ ჩვენ ღრმად იმედგაცრუებული ვართ იმით, რომ პროცესი, რომლის შეჩერებისკენ მოვუწოდებდით, წარიმართა მრავალი ჩართულობის შემდეგ. ეს არის ის, რაზეც საქარველოს პოლიტიკური ლიდერები, მათ შორის მმართველი პარტია შეთანხმდნენ, რომ ეს დანიშვნები შეჩერდებოდა ფართო, ინკლუზიური, მრავალპარტიული სასამართლო რეფორმის ჩატარებამდე. ეს ჯერ არ მომხდარა და სწორედ ამიტომ, ჩვენ ძალიან იმედგაცრუებული ვართ, რომ ეს მოსამართლეები დაინიშნენ. პარლამენტს შეეძლო ამ პროცესის შეჩერება. აშშ-ის მთავრობის, მათ შორის სახელმწიფო მდივნის მიერ გავრცელებული განცხადებები არ გაკეთებულა ნაჩქარევად, ეს არის საქართველოს სტრატეგიული პარტნიორის შეშფოთების გამომხატველი გზავნილები, რაც ძალიან სერიოზულად უნდა იყოს აღქმული და არ იქნას უგულებელყოფილი, როგორც ნაჩქარევად გაკეთებული", - განაცხადა კელი დეგნანმა.
შეგახსენებთ, პარლამენტის მიერ უზენაესი სასამართლოს მოსამართლეთა არჩევას განცხადებით გამოეხმაურნენ ამერიკის საელჩო საქართველოში, სახელმწიფო მდივანი ენტონი ბლინკენი და სახელმწიფო დეპარტამენტი.
კრიტიკული განცხადება გაავრცელა ევროკომისიამაც
საქართველოს პარლამენტმა უზენაესი სასამართლოს მოსამართლეობის ექვსი კანდიდატი 12 ივლისს დაამტკიცა.
მოსამართლეობის კანდიდატთა შერჩევის პროცესის შეჩერებისკენ ხელისუფლებას ოპოზიცია, არასამთავრობო სექტორი და შეერთებული შტატებისა და ევროკავშირის საელჩოები მოუწოდებდნენ.
უზენაესი სასამართლოს მოსამართლეთა შერჩევის პროცესის მონიტორინგის შესახებ მესამე ანგარიში გამოაქვეყნა ეუთო/ოდირმა, სადაც აღნიშნულია, რომ პროცესში არსებულმა ნაკლოვანებებმა რისკის ქვეშ დააყენა სასამართლო ხელისუფლების დამოუკიდებლობა.
