კულტურის, სპორტისა და ახალგაზრდობის მინისტრის, თეა წულუკიანის განცხადებით, ის არ ფიქრობს, რომ ლექსო ლაშქარავა არის 5 ივლისის მსხვერპლი. ამის შესახებ წულუკიანმა პირველი არხის გადაცემაში "თავისუფალი ხედვა" განაცხადა.
მისი თქმით, ის ასე ფიქრობს, თუმცა შესაძლოა, მისი ვარაუდი არ დადასტურდეს.
"თქვენ ყველას გაქვთ თქვენი აზრის გამოთქმის უფლება, მაგრამ მე მაქვს ჩემი აზრის უფლება. ეს არავის აუკრძალავს და ვერც აკრძალავს. მე მაქვს ჩემი ვარაუდი, რომ ეს არ არის კავშირში 5 ივლისთან. შეიძლება, ეს არ დადასტურდეს, ან ის არ დადასტურდეს, რაც თქვენ გგონიათ. თქვენ ბრძანეთ, რომ 5 ივლისი მოხდა და იყო მსხვერპლი, მაგრამ მსხვერპლი არ ყოფილა 5 ივლისს. მსხვერპლი დადგა რამდენიმე დღის შემდეგ. ოღონდ, ეს იყო თუ არა იმის მსხვერპლი, მე ვფიქრობ, რომ არ იყო. ამიტომ, ყველაზე მნიშვნელოვანია, შედეგს დაველოდოთ", - განაცხადა წულუკიანმა.
ლექსო ლაშქარავა, რომელიც 5 ივლისის მოვლენების დროს დაშავდა, 11 ივლისს, გამთენიისას, საკუთარ სახლში დედამ გარდაცვლილი ნახა. ოპერატორს 5 ივლისის აქციაზე "თბილისი პარაიდის" მოწინააღმდეგეები, რადიკალურად განწყობილი ჯგუფები სასტიკად გაუსწორდნენ. ის პროფესიულ მოვალეობას ასრულებდა.
გარდაცვლილი ოპერატორის საქმეზე ალტერნატიულ ექსპერტიზას დამოუკიდებელი ექსპერტი, ალექსანდრე გეჯაძე ჩაატარებს. გარდაცვალების ფაქტს სამედიცინო რეგულირების სააგენტო სწავლობს.
ლექსო ლაშქარავას გარდაცვალების ფაქტზე, ვაკე-საბურთალოს პოლიციის სამმართველოში, გამოძიება საქართველოს სისხლის სამართლის კოდექსის 115 მუხლით დაიწყო. დაინიშნა სასამართლო-სამედიცინო ექსპერტიზა.
გუშინ, შინაგან საქმეთა სამინისტროში გამართულ ბრიფინგზე განაცხადეს, რომ შუალედური ქიმიური ექსპერტიზის მიხედვით, ლექსო ლაშქარავას სისხლში აღმოჩნდა ნარკოტიკული ნივთიერება და შესაძლოა გარდაცვალების მიზეზი იყოს ზედოზირება.
