ჯანმრთელობის მსოფლიო ორგანიზაციის განცხადებით, ღარიბი ქვეყნების უმეტესობა, რომლებიც ვაქცინებს კოვაქსის გლობალური პლაფტორმის მეშვეობით იღებდნენ, დოზები ეწურებათ და ვერ ახერხებენ ვაქცინაციის კამპანიის გაგრძელებას.
ჯანმრთელობის მსოფლიო ორგანიზაციის უფროსი მრჩევლის ბრიუს ეილვარდის განცხადებით, კოვაქსის პლატფორმამ 131 ქვეყანას ვაქცინის 90 მილიონი დოზა მიაწოდა.
მისივე თქმით, ეს რაოდენობა არ არის საკმარისი იმისათვის, რათა მოსახლეობის ვირუსისგან დაცვა მოხდეს.
ღარიბი ქვეყნების უმეტესობა აფრიკის კონტინენტზე მდებარეობს, შესაბამისად, მაღალია რისკი იმისა, რომ ინფიცირების მესამე ტალღა დაიწყოს.
აფრიკის კონტინენტზე ამ დროისთვის მხოლოდ 40 მილიონი დოზა გაკეთდა, რაც ამ კონტინენტის მოსახლეობის მხოლოდ 2%-ზე ნაკლებისთვის არის საკმარისი.
ჯანმრთელობის მსოფლიო ორგანიზაციის (WHO) კოვაქს პლატფორმა მიზნად ისახავს, უზრუნველყოს ვაქცინების სამართლიანი განაწილება ყველა ქვეყანაში.
თავდაპირველად, პლატფორმის მესვეურებმა მიზნად დაისახეს, წლის ბოლომდე მსოფლიოს მასშტაბით კორონავირუსის საწინააღმდეგო ვაქცინის დაახლოებით 2 მლრდ დოზის გავრცელება.
თუმცა ვაქცინების განაწილების პროცესს ხელი შეუშალა წარმოებისა და მიწოდების შეფერხებამ, რამაც მწვავე დეფიციტი გამოიწვია იმ ქყვენებში, რომლებიც მთლიანად დამოკიდებულნი არიან კოვაქს პლატფორმაზე.
კოვაქს პლაფტორმა, რომელიც მთავრობებისა და დონორების შემოწირულობებით ფინანსდება, ჯანმრთელობის მსოფლიო ორგანიზაციის გარდა, ვაქცინების გლობალური ალიანსისა [Gavi] და გაეროს ბავშვთა ფონდის [unicef] მეშვეობით იმართება.
ღარიბ ქვეყნებში ვაქცინების მარაგების კრიტიკული მდგომარეობის გამო, ზოგიერი მდიდარი ქვეყანა, რომელთაც ზედმეტი დოზები აქვთ, გამოვიდა ინიციატივით, გაანაწილონ ვაქცინა კოვაქსის ან პირდაპირი მიწოდების გზით.
მანამდე, დიდი შვიდეულის სამიტზე, წამყვანი ეკონომიკები შეთანხმდნენ, რომ დანარჩენ მსოფლიოსთვის 1 მილიარდ დოზას გამოყოფდნენ.
კრიტიკოსები აცხადებენ, რომ დიდი შვიდეულის ქვეყნების ლიდერები სათანადო სერიოზულობით არ ეკიდებიან საზოგადოებრივი ჯანდაცვის კრიზისს და მათ მიერ გაცემული დაპირებების შესრულება ძალიან ნელა მიმდინარეობს.