შეერთებული შტატები "ღია ცის შეთანხმებას" აღარ დაუბრუნდება. ამის შესახებ ნათქვამია აშშ-ის სახელმწიფო დეპარტამენტის მიერ გავრცელებულ განცხადებაში.
სახელმწიფო დეპარტამენტმა სინანული გამოთქვა რუსეთის მიერ განხორციელებულ დარღვევებზე, რამაც ძირი გამოუთხარა შეთანხმების სულისკვეთებას.
მანამდე Associated Press-მა, წყაროზე დაყრდნობით, გაავრცელა ინფორმაცია, რომ სახელმწიფო მდივნის მოადგილემ ვენდი შერმანმა შეატყობინა რუსეთის საგარეო საქმეთა მინისტრის მოადგილეს სერგეი რიაბკოვს ვაშინგტონის გადაწყვეტილების შესახებ, შეთანხმებაში არ დაბრუნების შესახებ.
"შეერთებული შტატები აღარ აპირებს შეთანხმებაში დაბრუნების მცდელობების გაგრძელებას იმის გათვალისწინებით, რომ რუსეთმა არ აჩვენა შეთანხმებით გათვალისწინებული პირობების შესრულების მზაობა. გარდა ამისა, რუსეთის ბოლოდროინდელი ქმედებები, მათ შორის, უკრაინასთან მიმართებაში, არ შეესაბამება პარტნიორის ქცევას", - ნათქვამია განცხადებაში.
შეერთებულმა შტატებმა "ღია ცის შეთანხმება გასული წლის 22 ნოემბერს დატოვა. ვაშინგტონის პასუხად, 2021 წლის 15 იანვარს რუსეთმა დაიწყო შეთანხმებიდან გასვლის პროცედურები. 19 მაისს რუსეთის დუმამ მხარი დაუჭირა შეთანხმდებიდან გასვლას.
ღია ცის შეთანხმება 1992 წელს ჰელსინკიში მიიღეს და ითვალისწინებს სამხედრო სადაზვერვო ინფორმაციის ლეგალურად მოპოვებას ხელმომწერ სახელმწიფოებს შორის. დოკუმენტზე ხელი 34 ქვეყანას აქვს მოწერილი.
ხელშეკრულება ძალაში 2002 წელს შევიდა და მას წევრი ქვეყნები ერთმანეთის ნებართვით, ლეგალურად ახორციელებენ, ეგრეთ წოდებულ, საკონტოლო ფრენებს ხელმომწერი ქვეყნების ტერიტორიებზე. ფრენები მიზნად ისახავს დაკვირვებას არსებულ მდგომარეობაზე ეჭვების გაფანტვის მოტივით.
