რუსეთის საგარეო საქმეთა სამინისტროს ინფორმაციით, რუსეთმა "ღია ცის შეთანხმებიდან" გასვლის პროცედურები დაიწყო.
რუსეთის საგარეო უწყების მიერ გავრცელებულ ინფორმაციაში ვკითხულობთ, რომ "ღია ცის შეთანხმებიდან" შეერთებული შტატების გასვლის შემდეგ, "მონაწილე სახელმწიფოების ინტერესთა ბალანსი დაირღვა".
"რუსულმა მხარემ წარმოადგინა წინადადებები თუ როგორ შენარჩუნებულიყო შეთანხმების სიცოცხლისუნარიანობა, რასაც აშშ-მა და ნატოელმა მოკავშირეებმა მოკავშირეებმა მხარი არ დაუჭირეს. ამ მცდელობებში პროგრესის არარსებობის გამო, მოსკოვმა გადაწყვიტა შეთანხმებიდან გასვლა", - ნათქვამია განცხადებაში.
ამასთან, რუსული მხარე შეთანხმების მოქმედების შეჩერებაზე პასუხისმგებლობას ტრადიციულად აშშ-სა და ნატოელ მოკავშირეებს აკისრებს.
"ღია ცის შეთანხმებიდან" გასვლისთვის აუცილებელია შესაბამისმა ქვეყანამ ამის შესახებ 6 თვით ადრე ამცნოს შეთანხმების ხელმომწერ სახელმწიფოებს.
შეერთებულმა შტატებმა ღია ცის შეთანხმება გასული წლის ნოემბერში დატოვა.
ღია ცის შეთანხმება 1992 წელს ჰელსინკიში მიიღეს და ითვალისწინებს სამხედრო სადაზვერვო ინფორმაციის ლეგალურად მოპოვებას ხელმომწერ სახელმწიფოებს შორის. დოკუმენტზე ხელი 34 ქვეყანას აქვს მოწერილი.
ხელშეკრულება ძალაში 2002 წელს შევიდა და მას წევრი ქვეყნები ერთმანეთის ნებართვით, ლეგალურად ახორციელებენ, ეგრეთ წოდებულ, საკონტოლო ფრენებს ხელმომწერი ქვეყნების ტერიტორიებზე. ფრენები მიზნად ისახავს დაკვირვებას არსებულ მდგომარეობაზე ეჭვების გაფანტვის მოტივით.