ევროკავშირის ჯანდაცვის სფეროს მარეგულირებელმა, ევროპის მედიკამენტების სააგენტომ (EMA) ჩინური წარმოების ვაქცინის "სინოვაკის" შემოწმება დაიწყო. ამის შესახებ სააგენტოს განცხადებაშია ნათქვამი.
მედიკამენტების სააგენტოს განცხადებით, ლაბორატორიული კვლევების წინასწარი მონაცემები ცხადჰყოფს, რომ ვაქცინას იმუნური რეაგირების გამოწვევა ძალუძს.
ევროპის მედიკამენტების სააგენტოს, საბოლოო გადაწყვეტილების მიღების თარიღი არ დაუსახელებია, თუმცა განაცხადა, რომ პროცესს შესაძლოა "ნორმაზე ნაკლები დრო დასჭირდეს".
პარალელურად, ევროკავშირის მარეგულირებელი განიხილავს რუსულ Sputnik-ის ვაქცინას, CureVac-ისა და Novavax-ის ვაქცინებს. სინოვაკის ვაქცინაში გამოიყენება ინაქტივირებული ვირუსი, რომელსაც დაავადების გამოწვევა არ შეუძლია.
სხვადასხვა კვლევების მიხედვით, სინოვაკის ეფექტურობის მაჩვენებლები 51-დან 82 პროცენტამდე მერყეობს. იგი დამტკიცებულია ჩინეთის მარეგულირებლის მიერ, სამ სხვა ადგილობრივი წარმოების ვაქცინასთან ერთად.
ჯანმრთელობის მსოფლიო ორგანიზაცია სინოვაკის შესახებ გადაწყვეტილებას სავარაუდოდ ამ კვირის ბოლოს მიიღებს.
