ჯეი დი ვენსის თხოვნის შემდეგ, უკრაინამ იმ ტანკერებზე დარტყმები შეაჩერა, რომლებიც ნოვოროსიისკის პორტით სარგებლობენ. ინფორმაციას Financial Times წყაროებზე დაყრდნობით ავრცელებს.
გამოცემის ცნობით, ვაშინგტონი შეშფოთებული იყო, რომ უკრაინა ნავთობის ბაზრებზე კიდევ უფრო მეტ დესტაბილიზაციას გამოიწვევდა და ამერიკულ კომპანიებს ზიანს მიაყენებდა. საუბარია ტანკერებზე, რომლებსაც ნავთობი გადააქვთ, რომელიც ყაზახეთიდან მილსადენით რუსეთის ნოვოროსიისკის პორტში, კასპიის მილსადენის კონსორციუმის ტერმინალში მიეწოდება.
ვენსმა პრეზიდენტ ვოლოდიმირ ზელენსკის 31 ივლისს სატელეფონო საუბრისას სთხოვა, შეეწყვიტა ეს თავდასხმები.
მას შემდეგ უკრაინას კასპიის მილსადენის კონსორციუმის ტერმინალის მიმდებარე ტერიტორიაზე ტანკერებზე თავდასხმები აღარ განუხორციელებია.
ოფიციალურმა პირების განცხადებით, უკრაინა ასევე დათანხმდა, რომ არ დაარტყამს CPC-ის ინფრასტრუქტურას ან არარუსულ გემებს, იმ პირობით, რომ ეს გემები უკრაინის სანქციების ქვეშ არ იმყოფებიან და რუსულ ნავთობს ან რუსეთის სხვა ტვირთებს არ გადაიტანენ.
„ჩვენ ძალიან ყურადღებით ვუსმენთ ჩვენს ამერიკელ პარტნიორებს“, - განაცხადა უკრაინის მაღალჩინოსანმა და დასძინა, რომ აშშ-ის თხოვნის საპასუხოდ კიევმა შესაბამისი „მექანიზმები“ აამოქმედა. მისი თქმით, კასპიის მილსადენის კონსორციუმი„მუდმივად ფიგურირებდა აშშ-ისა და ყაზახეთის მთავრობებთან მოლაპარაკებებში“.
