დიდი ბრიტანეთის პრემიერ-მინისტრი დევიდ კამერონი საფრანგეთან სამხედრო სფეროში გაფორმებულ ხელშეკრულებას ისტორიულს უწოდებს. ამის შესახებ კამერონმა ფრანგულ-ბრიტანულ სამიტზე, ხელშეკრულებების გაფორმების შემდეგ განაცხადა.
"ახალი ხელშეკრულებები, რომლებიც საფრანგეთთან ბირთვულ და თავდაცვის სფეროებში თანამშრომლობას ითვალისწინებს, "ახალი თავია" იმ დიდ ისტორიაში, რომელიც ორ ქვეყანას თავდაცვის სფეროში თანამშროლობის მიმართულებით აკავშირებს", - განაცხადა კამერონმა.
მისივე თქმით, აღნიშნული ხელშეკრულებები ორი ქვეყნის მოქალაქეებს უფრო დაცულებს გახდის და სახელმწიფოს ფინანსებსაც დაზოგავს. კამერონმა განმარტა, რომ ბრიტანეთსა და საფრანგეთს შორის გაფორმებული ხელშეკრულებები არ გულსხმობს ევროპული არმიის შექმნის საწყისს.
"ბრიტანეთი და საფრანგეთი არიან და ყოველთვის დარჩებიან სუვერენულ სახლემწიფოებად და საკუთარ შეიარაღებას ყოველთვის გამოიყენებენ დამოუკიდებლად, საკუთარი ქვეყნის სახელმწიფო ინტერესებიდან გამომდინარე", - აღნიშნა კამერონმა.
შეგახსენებთ, რომ საფრანგეთმა და ბრიტანეთმა გააფორმეს ხელშეკრულება ბირთვულ და თავდაცვის სფეროებში თანამშრომლობის შესახებ. ხელშეკრულება ითვალისწინებს ბირთვული ქობინის განვითარების და თანამედროვე ტექნოლოგიებით აღჭურვის ცენტრის გახსნას და მის გამოცდებს. აღნიშნული, ცენტრი ბრიტანეთში შეიქმნება, ხოლო გამოცდები საფრანგეთში განხორციელდება.
ქვეყნებს შორის გაფორმდა მეორე ხელშეკრულებაც, რომელიც ერთიანი, კომბინირებული საექსპედიციო სამხედრო ძალის შექმნას ითვალისწინებს. აღნიშნულ პროექტში თითოეული მხარე 5000 ჯარისკაცს ჩართავს. ფრანგი და ბრიტანელი ჯარისკაცები ერთობლივი მომზადების კურსს გაივლიან, თუმცა საკუთარი ქვეყნების სახმედრო ბაზებზე იქნებიან დისლოცირებული.
ხელშეკრულებაში მნიშვნელოვანი ადგილი უჭირავს ქვეყნების მიერ ავიამზიდების ერთობლივ გამოყენებას - საფრანგეთი და ბრიტანეთი წვრთნებში და სამხედრო ოპერაციებში "Aირბუს"-ის ტანკერებს და "А400М" ტიპის თვითმფრინავებს გამოიყენებენ.
ამასთან კამერონის და სარკოზის მიერ ხელმოწერილი დოკუმენტის თანახმად, მოხდება ერთობლივი ინვესტირება გემთსაწინააღმდეგო რაკეტების, საბრძოლო და უპილოტო საფრენი აპარატების, საზღვაო ნაღმების აღმოსაჩენი საშუალებების და თანამგზავრული კავშირის საშუალებების შეძენაში.
დაუნინგ სტრიტზე აღნიშნულ ხელშეკრულებებს პრაქტიკული უწოდეს და განმარტეს, რომ მსგავსი შეთანხმებების გაფორმება ორი ქვეყნის წინაშე არსებულმა გამოწვევებმა განაპირობეს.
ბრიტანეთის "ლეიბორისტულ პარტიაში" კი, ხელშეკრულების პირობებს ბუნდოვანი უწოდეს და განაცხადეს, რომ მისი გაფორმების შემთხვევაში ბრიტანეთის თავდაცვის სისტემის შესახებ "დიდი შეკითხვები" გაჩნდება, რადგან შესაძლოა ბრიტანეთის სამხედრო ძალებმა დამოუკიდებლად მოქმედების უნარი დაკარგოს.
