წიგნისა და საავტორო უფლებების დღეს თბილისი ერთი წლით წიგნის მსოფლიო დედაქალაქი გახდება. თბილისის მერიისა და იუნესკოს ერთობლივი პროექტი 23 აპრილს, 16:30 საათზე, „აბრეშუმის ქარხანაში“ ოფიციალურად გაიხსნება. დედაქალაქის მერი კახა კალაძე წიგნის დედაქალაქის სტატუსს კუალა ლუმპურის მერიის დელეგაციისგან გადმოიბარებს.
საზეიმო ღონისძიებას დაესწრებიან იუნესკოს წიგნის მსოფლიო დედაქალაქის მენეჯერი იან დენისონი, იუნესკოს კეთილი ნების ელჩი ვერა მიხალსკი-ჰოფმანი, გამომცემელთა მსოფლიო ასოციაციის გენერალური მდივანი ხოსე ბორგინო, ამავე ასოციაციისპრეზიდენტი ბოდურ ალ ქასიმი, 2020 წლის წიგნის მსოფლიო დედაქალაქის მასპინძელი ქალაქის, კუალა ლუმპურის მერის მოადგილე ამვარ ბინ მოჰდ ზაინი, პროექტის დირექტორი შეიხ ფაიზალ ბინ შეიხ მანსორი, გვადალახარას წიგნის საერთაშორისო გამოფენის დირექტორი მარისოლ შულცი, ათენის წიგნის მსოფლიო დედაქალაქის კოორდინატორი ანა როუტსი, ასევე, დიპლომატიური კორპუსის წარმომადგენლები, პარტნიორი ორგანიზაციები, გამომცემლობების წარმომადგენლები და მწერლები.
გახსნის ცერემონიის ოფიციალური ნაწილის შემდეგ გაიმართება კოსტიუმირებული პერფორმანსი - „ათი ცოცხალი სურათი ქართული ლიტერატურიდან“. პერფორმანსი აერთიანებს ქართული მწერლობის ისტორიის ათ სცენას ადრექრისტიანული ხანიდან მეოცე საუკუნემდე. წარმოდგენის დრამატურგია დავით გაბუნია, სამხატვრო ხელმძღვანელი - უტა ბექაია, ქორეოგრაფი - ნათია ჩიკვაიძე, მუსიკის ავტორები - ნიკა მაჩაიძე და ტუსია ბერიძე.
გახსნის მეორე ნაწილი თანამედროვე ავტორებს ეთმობა. წარმოდგენილი იქნება ერთგვარი ფოტო-აუდიოპროექტი ცამეტი ქართველი ავტორის მონაწილეობით. გარდა ამისა, ღონისძიების სტუმრები ნახავენ მოკლე ჩანახატს გურამ დოჩანაშვილის შესახებ.
World Book Capital (წიგნის მსოფლიო დედაქალაქი) ფართომასშტაბიანი პროექტია, რომელიც 2001 წელს, UNESCO-ს გენერალური კონფერენციის გადაწყვეტილებით დაარსდა. პირველი დედაქალაქი მადრიდი იყო, შარშან კი წიგნის დედაქალაქი კუალა ლუმპური გახდა, რომელმაც, მსოფლიო პანდემიის მიუხედავად, პროექტი წარმატებით განახორციელა. პროექტი მიზნად ისახავს წიგნისა და კითხვის პოპულარიზაციას, ხელს უწყობს წიგნის ინდუსტრიისა და მასთან დაკავშირებული ყველა სფეროს განვითარებას, თანამედროვე ავტორების, მთარგმნელების, ბიბლიოთეკების, გამომცემლების ხელშეწყობას. სააპლიკაციო პროცესი რთული და კომპლექსურია. აპლიკაცია ერთდროულად უნდა მოიცავდეს ,როგორც ქალაქის სრულ ისტორიულ და თანამედროვე სურათს, ასევე, მთელი წლის განმავლობაში ზედმიწევნით გაწერილ გეგმას, თუ რა ტიპის ღონისძიებები განხორციელდება პროექტის ფარგლებში და რა გავლენა ექნება პროექტს ქალაქის განვითარებაზე ხანგრძლივ პერსპექტივაში.
თბილისის მერიის მულტიფუნქციური ბიბლიოთეკების გაერთიანების მიერ წარდგენილი აპლიკაცია გადაწყვეტილების მიმღებთათვის საინტერესო აღმოჩნდა, ვინაიდან მასში ჩანს როგორც პროექტის თანამედროვე კონცეფცია, ასევე, სამთავრობო სტრუქტურებისა და კერძო ორგანიზაციების ჰარმონიული თანამშრომლობა, პროექტების განხორციელების თანამედროვე გზები და მათში საზოგადოების მაქსიმალური ინტეგრაცია.
იუნესკოს პროექტი „თბილისი - წიგნის მსოფლიო დედაქალაქი“ ხორციელდება თბილისის მერიის ინიციატივითა და საქართველოს ბანკის მხარდაჭერით.
გარემოს დაცვისა და სოფლის მეურნეობის მინისტრმა, ლევან დავითაშვილმა „კლიმატის შესახებ ლიდერთა სამიტში” მიიღო მონაწილეობა. სამიტს, რომელიც ონლაინ ფორმატში ჩატარდა, ამერიკის შეერთებული შტატების პრეზიდენტის, ჯო ბაიდენის სპეციალურმა წარმომადგენელმა კლიმატის საკითხებში, ჯონ კერიმ უმასპინძლა.
სამიტზე, კლიმატური ცვლილებების შერბილებასა და სათბური გაზების ემისიების შემცირების საკითხებზე ღია დიალოგის მიზნით, მონაწილეობა მსოფლიოს 50-მდე ქვეყნის გარემოსდაცვითი მიმართულების ლიდერმა მიიღო.
სიტყვით გამოსვლისას, ლევან დავითაშვილმა ხაზგასმით აღნიშნა, რომ საქართველომ, 2017 წელს, პარიზის შეთანხმებასთან შეერთებით მზადყოფნა გამოთქვა, საერთაშორისო ვალდებულება აიღოს სათბურის გაზების (GHG) ემისიების ეტაპობრივ შემცირებაზე.
„2020 წლის იანვარში, საქართველოში შეიქმნა მულტიდისციპლინური, მაღალი დონის უწყებათაშორისი კლიმატის ცვლილების სამთავრობო საბჭო, რომლის მიზანი ქვეყანაში კლიმატური ცვლილებების მართვის გაუმჯობესება და პარიზის შეთანხმების განხორციელებაა. საქართველომ, ასევე, მიიღო „2030 წლის კლიმატის ცვლილების სტრატეგია და 2021-2023 წლების სამოქმედო გეგმა”, რომელიც ენერგიის წარმოების, ნარჩენების, მშენებლობის, მრეწველობის, ტრანსპორტის, სოფლის მეურნეობისა და სატყეო მეურნეობებთან დაკავშირებულ საკითხებს მოიცავს. მნიშვნელოვანია, საზოგადოება აქტიურად იყოს ჩართული ამ პროცესში. ამ მიზნით, ადგილობრივ ორგანიზაციებთან ერთად, საქართველოში ჩამოყალიბდა კლიმატის ცვლილების ეროვნული პლატფორმა, რომელიც გააერთიანებს არასამთავრობო ორგანიზაციებს, სამოქალაქო საზოგადოებას და სხვა დაინტერესებულ მხარეებს“, - განაცხადა ლევან დავითაშვილმა.
„კლიმატის შესახებ ლიდერთა სამიტი” წარმოადგენდა მოსამზადებელ შეხვედრას, სადაც მონაწილე მხარეებმა ერთმანეთს კლიმატურ ცვლილებასთან დაკავშირებული გამოცდილება გაუზიარეს. რაც შეეხება პარიზის შეთანხმებით განსაზღვრული ვალდებულებების შესრულების საკითხებს, მონაწილე ქვეყნები გლაზგოში დაგეგმილ კონფერენციაზე იმსჯელებენ.
