მივმართავ ხელისუფლებას, დავიწყოთ მძლავრი საინფორმაციო კამპანია ვაქცინაციის პოპულარიზაციისთვის , - აცხადებს ექსპერტი ჯანდაცვის საკითხებში სერგო ჩიხლაძე.

მისი თქმით, მიუხედავად იმისა, რომ ეს პროცესი უკვე დაგვიანებულია, ახლა ამის განხილვის დრო არ არის.

"ახლა უმნიშვნელოვანესია, სასწრაფოდ დავიწყოთ საინფორმაციო კამპანია, რომ მოსახლეობის აბსოლუტური უმრავლესობა დარწმუნდეს ვაქცინაციის საჭიროებაში და სარგებლიაობაშიც. ამისთვის უდიდესი მნიშვნელობა აქვს სანდოობის გაჩენას და ერთობლივ ზეპარტიულ ქმედებებს. ეს ყველას ინტერესში შედის - ხელისუფლების, ოპოზიციის, ექსპერტული წრეების. ვიმოქმედოთ ერთად", - ამბობს ჩიხლაძე.

დღეს, საქართველომ "კოვაქს" პლატფორმის საშუალებით მიიღო "ასტრაზენეკას" ვაქცინის პირველი პარტია – 43 200 დოზა, რომელიც დამზადებულია AstraZeneca-SKBio-ს (კორეის რესპუბლიკა) მიერ.

ვაქცინაციის დაწყება 15 მარტიდან არის დაგეგმილი. თავდაპირველად, აიცრებიან სამედიცინო მუშაკები.

უახლოეს კვირებში საქართველომ „ასტრაზენეკას“ ვაქცინის 129 600 დოზა უნდა მიიღოს. მომდევნო ეტაპზე, იგეგმება „ფაიზერ-ბიოენტექის“ ვაქცინის შემოტანაც.