თვითმფრინავის დაშვებას, რომლის ბორტზეც ალექსეი ნავალნი იმყოფება, აეროპორტში მისი მხარდამჭერები ელოდებიან. თვითმფრინავი ბერლინი-მოსკოვი მალე მოსკოვის ვნუკოვოს აეროპორტში დაეშვება.
ცოტა ხნის წინ, BBC-მ გაავრცელა, ინფორმაცია, რომ თვითმფრინავი ვნუკოვოს აეროპორტიდან გაბრუნდა და მოძრაობა კალუგის მიმართულებით გააგრძელა, თუმცა ლაინერმა მიმართულება ისევ შეიცვალა და კურსი კვლავ ვნუკოვოსკენ აიღო. ბოლო ხანს, ვნუკოვოს ტაბლოზე ჩანდა წარწერა, რომ აეროპორტი აღნიშნული თვითმფრინავის მისაღებად ემზადებოდა.
ოდნავ მოგვიანებით გავრცელდა დაუზუსტებელი ინფორმაცია, რომ ვნუკოვოს აეროპორტმა უარი განაცხადა თვითმფრინავის მიღებაზე, ამიტომ ხომალდმა მოძრაობა შერემეტევოს აეროპორტის მიმართულებით განაგრძო.
ალექსი ნავალნიმ რუსეთში დაბრუნების განზრახვის შესახებ 13 იანვარს განაცხადა.
12 იანვარს რუსეთის სასჯელაღსრულების ფედერალურმა სამსახურმა სასამართლოს ალექსეი ნავალნისთვის პირობითი სასჯელის რეალური განაჩენით შეცვლის მოთხოვნით მიმართა.
ნავალნის პირობითი სასჯელი და გამოსაცდელი ვადა „ივ როშეს“ საქმესთან დაკავშირებით ჰქონდა შეფარდებული.
ალექსეი ნავალნი გასული წლის აგვისტოში მოწამლეს ნერვული აგენტი "ნოვიჩოკით". ის სამკურნალოდ ბერლინში გადაიყვანეს, სადაც ექიმებმა მოახერხეს მისი გადარჩენა. კრემლმა არაერთხელ უარყო რაიმე სახის მონაწილეობა მის მოწამვლაში.
რუსეთის პრეზიდენტმა ვლადიმირ პუტინმა ყოველწლიურ პრესკონფერენციაზე განაცხადა, რომ ოპოზიციონერი პოლიტიკოსი ალექსეი ნავალნი "აშშ-ის სპეცსამსახურების მხარდაჭერით სარგებლობს" და დასძინა, რომ "რუსეთის სპეცსამსახურებს ნავალნის მოკვლა რომ ნდომოდათ, საქმეს ბოლომდე მიიყვანდნენ".
