არ აქვს მნიშვნელობა რა გვარია ესა თუ ის მინისტრი, - განაცხადა პარლამენტის ერთ-ერთმა ვიცე-სპიკერმა დავით სერგეენკომ პლენარული სხდომის დაწყებამდე.
მისი თქმით, მნიშვნელოვანია, როგორ ვითარდება ესა თუ ის დარგი.
„არ აქვს მნიშვნელობა რა გვარია ესა თუ ის მინისტრი. მნიშვნელოვანია როგორ ვითარდება ესა თუ ის დარგი. ახლა ამ ჩვენს პოზიციას დაემატა რეალურად საომარი მდგომარეობა, რაც გვაქვს პანდემიასთან მიმართებაში. სამთავრობო გუნდმა, პრემიერ-მინისტრმა და პარტიამ გადაწყვიტა, რომ ამ ეტაპზე არ იქნებოდა სწორი ცვლილებების განხორციელება, რადგანაც მიმდინარე პროცესები უწყვეტ მართვას საჭიროებს“, - აღნიშნა სერგეენკომ.
დღეს მმართველი გუნდის დეპუტატებმა მთავრობის შემადგენლობას ნდობა უნდა გამოუცხადონ.
რიგგარეშე სხდომამდე მინისტრობის კანდიდატებს რამდენიმე დღის განმავლობაში სხვადასხვა კომიტეტებში უსმენდნენ. ახალ შემადგენლობაში მხოლოდ მცირე სიახლეა. პარლამენტში გადანაცვლების შემდეგ თეა წულუკიანი იუსტიციის მინისტრის პოსტზე მისმა მოადგილემ გოჩა ლორთქიფანიძემ შეცვალა.
ერთ-ერთი ვიცე-სპიკერის დავით სერგეენკოს განცხადებით, პარტიამ მიიღო გადაწყვეტილება, რომ სამთავრობო გუნდში ახლა ცვლილებების მიღება სწორი არ იქნებოდა.
