სამთავრობო გუნდმა გადაწყვიტა, რომ ამ ეტაპზე არ იქნებოდა სწორი ცვლილებების განხორციელება, - განაცხადა პარლამენტის ერთ-ერთმა ვიცე-სპიკერმა დავით სერგეენკომ პლენარული სხდომის დაწყებამდე.
"ის, რომ დღევანდელი სხდომა ოპოზიციის მონაწილეობის გარეშე გაიმართება, რა თქმა უნდა არ არის კარგი, თუმცა ჩვენ ნამდვილად არ გვაქვს ის ფუფუნება, რომ სანამ მოლაპარაკებები გაგრძელდება, იქამდე გავაჩეროთ ეს პროცესი და არც მთავრობა დავამტკიცოთ, არც ბიუჯეტი.
არ აქვს მნიშვნელობა რა გვარია ესა თუ ის მინისტრი. მნიშვნელოვანია როგორ ვითარდება ესა თუ ის დარგი. ახლა ამ ჩვენს პოზიციას დაემატა რეალურად საომარი მდგომარეობა, რაც გვაქვს პანდემიასთან მიმართებაში. სამთავრობო გუნდმა, პრემიერ-მინისტრმა და პარტიამ გადაწყვიტა, რომ ამ ეტაპზე არ იქნებოდა სწორი ცვლილებების განხორციელება, რადგანაც მიმდინარე პროცესები უწყვეტ მართვას საჭიროებს“, - აღნიშნა ერთ-ერთმა ვიცე-სპიკერმა დავით სერგეენკომ.
დღეს მმართველი გუნდის დეპუტატებმა მთავრობის შემადგენლობას ნდობა უნდა გამოუცხადონ.
რიგგარეშე სხდომამდე მინისტრობის კანდიდატებს რამდენიმე დღის განმავლობაში სხვადასხვა კომიტეტებში უსმენდნენ. ახალ შემადგენლობაში მხოლოდ მცირე სიახლეა. პარლამენტში გადანაცვლების შემდეგ თეა წულუკიანი იუსტიციის მინისტრის პოსტზე მისმა მოადგილემ გოჩა ლორთქიფანიძემ შეცვალა.
