გერმანიის, საფრანგეთისა და შვედეთის ელჩები რუსეთის საგარეო საქმეთა სამინისტროში დაიბარეს მოსკოვის წინააღმდეგ ევროკავშირის მიერ ახლახანს დაწესებულ სანქციებთან დაკავშირებით. განაცხადა რუსეთის საგარეო საქმეთა მინისტრის სპიკერმა მარია ზახაროვამ.
"დღეს საგარეო საქმეთა სამინისტროში, 11:00 საათზე, ევროკავშირის მიერ ანტირუსული სანქციების შემოღებასთან დაკავშირებით, გერმანიის, საფრანგეთისა და შვედეთის დიპლომატიური მისიების ხელმძღვანელები გამოიძახეს", - თქვა ზახაროვამ.
ევროკავშირმა ოპოზიციონერ ალექსეი ნავალნის მოწამვლის გამო რუსეთის წინააღმდეგ სანქციები 15 ოქტომბერს დააწესა. სანქციები შეეხო რუსეთის ექვს მოქალაქესა და ერთ ორგანიზაციას.
სანქციები დაუწესდა:
რუსეთის უსაფრთხოების ფედერალური სამსახურის დირექტორს, ალექსანდრ ბორტნიკოვს;
რუსეთის პრეზიდენტის ადმინისტრაციის უფროსის პირველ მოადგილეს, სერგეი კირიენკოს;
შიდა პოლიტიკის საკითხებში პრეზიდენტის სამმართველოს უფროსს, ანდრეი იარინს;
თავდაცვის მინისტრის ორ მოადგილეს - ალექსეი კრივორუჩკოსა და პაველ პოპოვს;
ციმბირის ფედერალურ ოლქში რუსეთის პრეზიდენტის ოფიციალურ წარმომადგენელს, სერგეი მენიალოს.
სანქცირებულთა სიაში ასევე, მოხვდა ორგანული ქიმიისა და ტექნოლოგიების სამეცნიერო კვლევითი სახელმწიფო ინსტიტუტი.
ევროკავშირის შემდეგ ალექსეი ნავალნის მოწამვლის საქმეზე რუსეთს სანქციები დიდმა ბრიტანეთმაც დაუწესა.
ალექსეი ნავალნი ამ წლის აგვისტოში მოწამლეს ნერვული აგენტი "ნოვიჩოკით". ის სამკურნალოდ ბერლინში გადაიყვანეს, სადაც ექიმებმა მოახერხეს მისი გადარჩენა. კრემლმა არაერთხელ უარყო რაიმე სახის მონაწილეობა მის მოწამვლაში.
რამდენიმე დღის წინ, რუსეთის პრეზიდენტმა ვლადიმირ პუტინმა ყოველწლიურ პრესკონფერენციაზე განაცხადა, რომ ოპოზიციონერი პოლიტიკოსი ალექსეი ნავალნი "აშშ-ის სპეცსამსახურების მხარდაჭერით სარგებლობს" და დასძინა, რომ "რუსეთის სპეცსამსახურებს ნავალნის მოკვლა რომ ნდომოდათ, საქმეს ბოლომდე მიიყვანდნენ".