შეერთებული შტატების სურსათისა და წამლის ადმინისტრაციამ (FDA) "ფაიზერის" მიერ შექმნილი კორონავირუსის ვაქცინა დაამტკიცა.
ამ გადაწყვეტილებით, ფედერალურ ხელისუფლებას შესაძლებლობა მიეცემა მალე დაიწყოს კორონავირუსის მასობრივი ვაქცინაციის პროგრამა.
შეერთებული შტატები გახდა მესამე ქვეყანა დიდი ბრიტანეთისა და კანადის შემდეგ, რომელიც გამოიყენებს Pfizer/BioNTech ვაქცინას მასობრივი იმუნიზაციისთვის.
Pfizer-ისა და BioNTech-ის მიერ შემუშავებული ვაქცინა უნდა ინახებოდეს –70 C ტემპერატურაზე.
"ამერიკის ხმის" ინფორმაციით, ვაქცინაციის პროცესი რამდენიმე საათში დაიწყება და თვის ბოლომდე, ამერიკის შეერთებული შტატები გეგმავს 20 მილიონი ადამიანის ვაქცინაციას.
პირველ ეტაპზე, ვაქცინას, ექიმები და რისკ ჯგუფში მყოფი ადამიანები მიიღებენ. სულ, ამერიკაში პირველ ეტაპზე 40 მილიონი დოზა ვაქცინა იქნება. რაც 20 მილიონის ვაქცინაციისთვის არის საკმარისი.
18 ნოემბერს Pfizer-მა და BioNTech-მა განაცხადეს, რომ მათ მიერ შემუშავებულმა ვაქცინამ 95%-იანი ეფექტურობა აჩვენა.
"ფაიზერის" ვაქცინის გამოყენება დიდმა ბრიტანეთმა 8 დეკემბრიდან დაიწყო.
