ეს არ არის კომენდანტის საათი, ეს გადაადგილების შეზღუდვაა. განაცხადა საქართველოს რეგიონული განვითარებისა და ინფრასტრუქტურის მინისტრმა, ვიცე-პრემიერმა მაია ცქიტიშვილმა უწყებათაშორისი საბჭოს მიერ დაწესებული შეზღუდვებზე საუბრისას.
"მინდა აღვნიშნო, რომ ეს არ არის კომენდანტის საათი და ეს არის გადაადგილების შეზღუდვა და ამ შეზღუდვების დარღვევისთვის იმოქმედებს ის სანქცია, რომელიც არის დაწესებული, კერძოდ 2 000 ლარი", - თქვა ცქიტიშვილმა.
საქართველოში არსებული ეპიდემიოლოგიური მდგომარეობისა და ინფიცირებულთა რაოდენობის სწრაფი ზრდის გათვალისწინებით, უწყებათაშორისმა საკოორდინაციო საბჭომ დამატებითი წერტილოვანი შეზღუდვების დაწესების გადაწყვეტილება მიიღო.
• 9 ნოემბრიდან თბილისში, ქუთაისში, ბათუმში, რუსთავში, ზუგდიდში, გორსა და ფოთში, 22:00 საათიდან დილის 5 საათამდე შეზღუდული იქნება გადაადგილება.
• თბილისში, ქუთაისში, ბათუმში, რუსთავში, ზუგდიდში, გორსა და ფოთში დროებით დაიხურება როგორც მუნიციპალური, ისე კერძო საბავშვო ბაღები.
• ყველა ორგანიზაცია იმუშავებს 22:00 საათამდე, გარდა სამედიცინო და ფარმაცევტული დანიშნულებისა და სტრატეგიული მნიშვნელობის ობიექტებისა.
