საქართველოს მთავრობა სტიქიით დაზარალებულ კახეთის რეგიონს დამატებით თანხებს გამოუყოფს. როგორც კახეთის საინფორმაციო ცენტრს გუბერნატორის პირველმა მოადგილემ გიორგი სიბაშვილმა განუცხადა, ამ დროისთვის ჯერ-ჯერობით 500 ათასი ლარია გამოყოფილი.
„პირველ ეტაპზე გამოიყო 300 ათასი ლარი, რომელიც ლაგოდეხის და ყვარლის რაიონებზე გადანაწილდება, ხოლო მეორე ეტაპზე „აღმოსავლეთ წყალს" გამოეყო 200 ათასი ლარი, სტიქიით დაზარალებულ რაიონებში სასმელი წყლის სათავე ნაგებობების შესაკეთებლად. დამატებით თანხებს მთავრობა დღეს გამოყოფს, ოღონდ თანხის რაოდენობა ჯერ-ჯერობით უცნობია", - განაცხადა სიბაშვილმა.
შეგახსენებთ, რომ სტიქიამ კახეთს 7, 865 მილიონი ლარის ოდენობის ზარალი მიაყენა. ინფორმაციას ამის შესახებ კავკასიის გარემოსდაცვითი არასამთავრობო ორგანიზაციების ქსელი ავრცელებს. ოფიციალური მონაცემებით, ყველაზე მეტად ყვარლის რაიონი დაზარალდა, სადაც ზარალის ოდენობამ 3 მილიონ 638 ათასი ლარი შეადგინა. ბევრ სოფელში ინფრასტრუქტურა, ნაპირსამაგრი გაბიონები და სასმელი წყლის სათავე ნაგებობები დაზიანდა ან განადგურდა. დატბორილია 1000 ჰექტარზე მეტი ფართობის სასოფლო-სამეურნეო ნაკვეთები. ამ მიმართულებით ზარალი 1,398 მილიონ ლარს შეადგენს. აღსადგენია ასევე ახმეტა-თიანეთის გზის 200 მეტრიანი მონაკვეთი.